काठमाडौं । सेयर बजारमा भीषण पहिरो गएको छ । स्थानीय तहको चुनाव अघिको एक सातामा १३० अंकले बढेको नेप्से चुनावपछिको पहिलो कारोबार दिनमा उच्च अंकले घटेको हो ।
५ दिन बन्द भएर खुलेको बजारमा आज एकैदिन ८५ अंकले घटेको छ । सूचकमा भारी गिरावट आए पनि कारोबार रकम भने उस्तै रहेको छ । चुनावअघि औसतमा दैनिक डेढ अर्ब हाराहारी कारोबार हुँदै आएकोमा आज पनि सोही हाराहारीमा कारोबार भएको छ ।
मंगलबार नेप्से ८४.९० अंकले घटेर २२६५.५२ विन्दुमा आइपुगेको छ । यसदिन २२१ कम्पनीको १ अर्ब ६४ करोड ४० लाख ५० हजार २३९ रुपैयाँ बराबरको ३५ लाख ९५ हजार ५६८ कित्ता सेयर किनबेच भएको छ ।
आज कारोबारमा आएका १३ वटै समूहको परिसूचक राताम्मे भएका छन् । अन्य समूह सबैभन्दा धेरै ५.८७ प्रतिशतले घटेको छ । त्यस्तै, फाइनान्स र हाइड्रोपावर समूह पनि ५ प्रतिशतभन्दा धेरैले घटेको छ ।
आज जाल्पा लघुवित्तको सर्वाधिक कारोबार भएको छ । यसको पौने १० करोड रुपैयाँकोे सेयर किनबेच भएको छ । त्यसैगरी, अरुण भ्याली र सानिमामाइ हाइड्रोपावर साढे ५५ करोड बढीको कारोबार हुँदै शीर्ष तीनमा रहे ।
उच्च अंकले घटेको बजारमा आज आधादर्जन कम्पनीको सेयर मूल्यमा नेगेटिभ सर्किट लागेको छ । युनाइटेड इन्स्योरेन्स, लुम्बिनी जनरल इन्स्योरेन्स र सूर्योदय वोमी लघुवित्तको सेयर मूल्य ठ्याक्कै १० प्रतिशतले घटेको छ ।
त्यसैगरी, बुद्धभूमि नेपाल, इमर्जिङ नेपाल र दिव्यश्वरी हाइड्रोपावरका सेयरधनीले करिब १० प्रतिशत गुमाएका छन् । त्यस्तै, ग्रीन भेन्चर्स, लिबर्टी इनर्जी र युनिभर्सल पावरको सेयर मूल्य ९ प्रतिशतले घटेको छ भने ज्योति लाइफ, प्रुडेन्सियल, सूर्य लाइफ, मल्टीपर्पस फाइनान्स, ग्रीन लाइफ, पञ्चकन्यामाइ, राधी जलविद्युत्को सेयर मूल्य साढे ८ प्रतिशतले घटेको छ ।
