काठमाडौं । नेपाल राष्ट्र बैंकले १८ वैशाखदेखि २ अर्ब रुपैयाँ बराबरको नागरिक बचत पत्र विक्री गर्ने भएको छ । बैंकले ४ वर्ष अवधिको उक्त बचतपत्र विक्री गर्न लागेको हो ।
राष्ट्र बैंकले उक्त बचत पत्रको ब्याजदर ११ प्रतिशत तोकेको छ । यो झन्डै हाल वाणिज्य बैंकहरुले निक्षेप दिँदै आएको ब्याजदर जति नै हो । वाणिज्य बैंकहरुले हाल निक्षेपमा ११.०३ प्रतिशत ब्याज दिँदै आएका छन् ।
यस बचत पत्रको ब्याज भुक्तानी ६/६ महीनामा हुन्छ । इच्छुक लगानीकर्ताले वैशाख २२ गतेसम्म आवेदन दिन सक्नेछन् ।
लगानीकर्ताले कम्तीमा १० हजारदेखि अधिकतम आफूले चाहेजति लगानी गर्न सक्नेछन् । यस्तो बचत पत्रको धितोमा अन्य बैंक तथा वित्तीय संस्थाहरूबाट ऋण समेत लिन सकिन्छ।
सरकारको लागि आन्तरिक ऋण उठाउन यस्तो बचत पत्र जारी गरिन्छ। राष्ट्र बैंकले चालु आर्थिक वर्षको लागि ४ अर्ब रुपैयाँको बचत पत्र निष्कासन गर्ने योजना सार्वजनिक गरेको छ। यो वैशाखदेखि असारसम्ममा मात्रै ३ अर्ब ३ करोड रुपैयाँ उठाउन लागेको हो।
