काठमाडौं । नेष्डो समृद्ध लघुवित्त वित्तीय संस्थाको सेयर मूल्यमा लगातार १३ औं दिन पोजेटिभ सर्किट लागेको छ । चैत १४ गतेदेखि कारोबारमा आएको लघुवित्तको त्यसयता सेयर मूल्य दैनिक १० प्रतिशतले बढ्दै आएको हो ।
७४७.७ रुपैयाँमा पहिलो कारोबार खुलेको कम्पनीको सेयर मूल्य १३ कारोबार दिनमा बढेर २४८८.९० रुपैयाँ पुगेको छ । १३ दिनमा लघुवित्तको सेयर भाउ प्रतिकित्ता १७४१.२ रुपैयाँ अर्थात् साढे ३ गुणा बढेको छ ।
कारोबारमा आएको तीन साता बिते पनि लघुवित्तको सेयर आपूर्ति अत्यन्त न्यून रहेको छ । हालसम्म लघुवित्तको ३ हजार कित्ता हाराहारीम मात्र कारोबार भएको छ ।
लघुवित्तमा सर्वसाधरणको सेयर हिस्सा थोरै रहेकाले आपूर्ति कम भएको हो । नेप्सेमा सर्वसाधरणतर्फको ८ लाख २८हजार कित्ता सेयर सूचीकृत भए पनि बलियो कम्पनी रहेकाले भाउ निकै माथि जाने आशामा सेयर विक्रीमा ल्याएका छैनन् ।
लघुवित्तले फागुन ११ देखि प्रतिकित्ता १०० रुपैयाँ दरले ८ करोड २८ लाख ७५ हजार ५०० रुपैयाँ बराबरको ८ लाख २८ हजार ७५० कित्ता आइपीओ विक्रीमा ल्याएको थियो ।
१७ करोड २१ लाख २५ हजार रुपैयाँ चुक्ता पूँजी रहेको लघुवित्तको आइपीओ वितरणपछि २५ करोड ५० लाख रुपैयाँ पुगेको छ ।