काठमाडौं । कोरोना महामारीले निकै प्रभावित बनेको फिल्म क्षेत्र लयमा फर्किन थालेको छ । स्वदेशी तथा विदेशी फिल्महरूको प्रदर्शनले दर्शकहरूको आकर्षण बढाएसँगै ठप्प बनेका हलहरू संञ्चालनमा आएका हुन् ।
करिब दुई वर्षदेखि कहिले खुल्ने त कहिले बन्द हुने गरेका फिल्म हलहरू पछिल्ला केही महिना यता व्यस्त बनेका छन् । विशेषगरी नेपाली सिनेमा ‘म यस्तो गित गाउँ छु २’ र साउथ इन्डियन फिल्म पुष्पा सिनेमाको प्रदर्शनले हलहरू भरिन थालेका थिए भने व्यापार समेत आक्रमक रुपमा गरे ।
महामारीमा सरकारले हल खोल्न व्यवसायीहरूलाई अनुमति दिएको थिएन । संक्रमणको जोखिम कायमै रहेका कारण यस अवधिमा दर्शकहरू आउने वातावरण पनि थिएन । देशको समग्र आर्थिक अवस्था अस्तव्यस्त बनेका कारण मानिसको चहलपहल न्यून भएको थियो भने होटल, पर्यटन तथा सिनेमा व्यवसाय ठप्प प्राय बनेका थिए ।
फिल्म निमार्ता र हाल संञ्चालकहरू बीच कसले बढी जोखिम लिने भन्ने रस्साकस्सी नै चलेको थियो । चलचित्र निमार्ताहरू रिलिज गर्न मानिरहेका थिएनन भने व्यवसायीहरूमा दर्शक नआउने त्रास थियो । यस अवधिमा कतिपय सिनेमा हलहरू टिक्न नसकेर सधैंको लागि बन्द नै भएका छन् ।
हलहरू पूर्ण क्षमतामा चल्न थाले
पछिल्लो एक महिनामा मल्टिप्लेक्स तथा एकल हलहरू पूर्ण क्षमतामा चल्न थालेको हल संञ्चालकहरू बताउँछन् । फिल्म हल व्यवसायीहरूको संस्था नेपाल चलचित्र संघका महासचिव अर्जुन श्रेष्ठले हलहरू पुरानै अवस्थामा नफर्किए पनि फिल्म अनुसार पूर्ण क्षमतामा चल्न थालेको बताए ।
‘पछिल्लो एक महिना यता हलहरू राम्रै चलिरहेका छन । सूचना प्रविधिको प्रयोगले युट्यूब लगायतका माध्यमबाट कस्तो फिल्म भन्ने पहिले नै जानकारी राखेर मात्रै दर्शकहरू हेर्न आउँछन्,’ उनले भने, ‘खुल्न थालेको केही समय भए पनि सुरुआत राम्रै छ । कन्टेन राम्रो र पब्लिसिटी भएका फिल्म दर्शकको रोजाइमा पर्ने गरेका छन् ।’
नेपालमै पनि विभिन्न मलहरूमा पछिल्लो समय मल्टिप्लेक्स र सुविधा सम्पन्न हलहरू खुल्नेक्रम बढ्दो छ । सुविधा सम्पन्न र गुणस्तरीय हलहरू दर्शकको रोजाइमा पर्ने भएका कारण मल्टिप्लेक्स हलहरूमा पनि दर्शकको कमी नभएको उनले बताए ।
पुराना तथा जिर्ण बनेका फिल्महलहरू भने बन्द हुनेक्रम बढेकोे उनको भनाइ छ । दर्शकहरूमा फिल्म हेर्ने बानि पर्न अझै केही समय लाग्ने श्रेष्ठले बताए ।
कोभिडकै बीचमा दर्जन हल थपिए
कोभिड माहामारी कारण केही हल सधैंका लागि बन्द भए पनि यही समयमा झन्डै १ दर्जन नयाँ हल थपिएका छन् । पछिल्लो दुई वर्षमा १ दर्जन बढी नयाँ सिनेमा हल संचालनमा आए भने थप आधा दर्जन बढी हल निर्माणका क्रममा रहेका छन् ।
केही समय अघिमात्रै वीरगञ्ज, किर्तिपुर, दमौलीमा नयाँ चलचित्रहलहरू संञ्चालनमा आएका थिए । यस्तै दरबारमार्ग, विश्वज्योति लगायतका हलहरू संञ्चालनमा आउने तयारीमा छन ।
हाल देशभर १०० बढी हलहरू संञ्चालनमा रहेको चलचित्र संघका उपाध्यक्ष नरेन्द्रमान महर्जनले बताए । ‘पुराना हलहरू बन्द भइरहेका छन भने नयाँ हलहरू खुलिरहेका छन,’ उनी भन्छन, ‘अहिले देशभर सय बढी संञ्चालन भइरहेका छन ।’
फिल्महलहरूमा दर्शको आकर्षण बढ्दै गएको र नयाँ हलहरू पनि निमार्णको चरमा रहेको उनको भनाइ छ । उनका अनुसार ५० बढी नेपाली फिल्महरू प्रदर्शनको लाइनमा छन । कोरोना अवधिमा फिल्म बने पनि प्रदर्शन नभएका कारण थुप्रै चलचित्रहरू प्रदर्शनको तयारीमा छन ।
महामारीपछि ठप्प बनेको फिल्म व्यवसाय पुरानै अवस्थामा फर्किन अझै केही समय लाग्ने व्यवसायीहरूले बताइरहेका छन ।
