काठमाडौं । साताको पहिलो दिने सेयर बजारमा दोहोरो अंकको गिरावट आएको छ । गत साता लगातार ५ दिन दोहोरो अंकले घटेको नेप्से बुधबार ४० अंकले कमब्याक गरेको थियो । फेरि बिहिबार २३ अंकले घटेको सेयर बजारमा आज पनि ३० अंकले गिरावट आएको हो ।
सूचकसँगै आज कारोबार रकममा पनि गिरावट आएको छ । आज कारोबार रकम १ अर्ब ४६ करोडमा सीमित भएको छ । यसदिन २२५ कम्पनीको १ अर्ब ४६ करोड ७ लाख ७३ हजार ७२९ रुपैयाँ बराबरको ३२ लाख ५३ हजार ८१६ कित्ता सेयर किनबेच भएको छ ।
आज कारोबारमा आएका १३ वटा समूहमध्ये म्यचूअल फन्ड बाहेक बाँकी सबै समूहको परिसूचक राताम्मे भएको छ । सबैभन्दा धेरै अन्य समूह ३.१३ प्रतिशतले घटेको छ । आज करोबारमा आएको २२५ कम्पनीमध्ये जम्मा १९ कम्पनीको सेयर मूल्य बढेको छ भने १७२ कम्पनीको घटेको छ । ४ कम्पनीको सेयर मूल्य स्थिर रहेको छ ।
आज सूर्य लाईफ इन्स्सयोरेनस कम्पनीको सर्वाधिक कारोबार भएको छ । यसको ९ करोड ७२ लाख रुपैयाँ बराबरको सेयर किनबेच भएको छ । त्यसैगरी, शिद्धार्थ इन्स्योरेन्सको ५ करोड, नविल बैंक र नेपाल लाईफ इन्स्योरेन्स कम्पनीको ४ करोड रुपैयाँ बढी बराबरको सेयर किनबेच भएको छ । लाईफ इन्स्योरेन्स कर्पोरेसन ३ करोड सहित शिर्ष कारोबार हुने पाँचौँ कम्पनीमा रहे ।
दोहोरो अंकले घटेको बजारमा आज ३ कम्पनीको सेयर मूल्यमा पोजेटिभ सर्किट लागेको छ । राष्ट्र उत्थान लघुवित्तको सेयर मूल्य ठ्याक्कै १० प्रतिशतले बढेको छ भने इमर्जिङ नेपाल र नेष्डो समृद्ध लघुवित्तका सेयरधनीले करिब १० प्रतिशत कमाएका छन् । घट्दो बजारमा आज युनाइटेड मार्दि हाइड्रोपावरका सेयर धनीले सबैभन्दा धेरै ५.०२ प्रतिशतले गुमाएका छन् ।
त्यसैगरी, सूर्यलाईफ इन्स्योरेन्स कम्पनीका लागनीकर्ताले ५.०१, समलिङ्क पावर कम्पनी, हिमालयन उर्जा विकास कम्पनीका लागनीकर्ताले ४ प्रतिशत बढीले गुमाएका छन् ।
