काठमाडौं । सेयर बजारमा भीषण पहिरो गएको छ । गतसाता ९० अंकले घटेको बजार आज एकैदिन १०० अंकले घटेको हो ।
सूचकमा उच्च गिरावट आए पनि करोबार रकम भने उत्साहजनक नै रहेको छ। आज झन्डै ६ अर्ब बराबरको सेयर खरिदविक्री भएको छ ।
आइतबार नेप्से १००.२४ अंकले घटेर २७००.३२ विन्दुमा आइपुगेको छ । आज २२७ कम्पनीको ५ अर्ब ९७ करोड ७२ लाख १४ हजार ७३१ रुपैयाँ बराबरको १ करोड १६ लाख ६१ हजार ६३९ कित्ता सेयर किनबेच भएको छ ।
आज कारोबारमा आएका १३ वटै समूहको परिसूचक राताम्मे भएको छ । हाइड्रोपावर समूह सबैभन्दा धेरै ५.४७ प्रतिशत घटेको छ । त्यस्तै, विकास बैंक, फाइनान्स, निर्जीवन बीमा र उत्पादनमूलक समूह पनि ४ प्रतिशतभन्दा धेरैले घटेको छ ।
आज कारोबार भएका २२७ कम्पनीमध्ये जम्मा ५ कम्पनीको सेयर मूल्य बढेको छ भने २१५ कम्पनीको घटेको छ । ५ कम्पनीको मूल्य स्थिर रहेको छ ।
घट्दो बजारमा पनि मूल्य बढ्ने ५ वटै कम्पनीहरु सामूहिक लगानी कोष समूहका रहेका छन् । आज सबैभन्दा धेरै एनआइबीएल समृद्धि फण्ड २ को १.९४ प्रतिशतले बढेको छ ।
त्यसैगरी, सनराइज ब्लूचिप फण्ड १.१०, नबिल ब्यालेन्स फण्ड ०.७३, मेगा म्युचुअल फण्ड ०.५५ र लक्ष्मी उन्नति कोषको सेयर मूल्य ०.१९ प्रतिशतले बढेको छ ।
