काठमाडौं । सेयर बजारमा दोहोरो अंकको गिरावट आएको छ । बजार खुलेर ३० अंकसम्म बढेको नेप्से अन्त्यमा दोहोरो अंकले घटेर बन्द भएको हो । समग्रमा यससाता नेप्से ९० अंकले बढेको छ ।
सूचकमा गिरावट आए पनि कारोबार रकममा भने ठूलो बढोत्तरी आएको छ । अघिल्लो कारोबार दिनको तुलनामा कारोबार रकम २ अर्बले बढेर साढे ८ अर्ब नाघेको छ ।
बिहीबार नेप्से १४.५८ अंकले घटेर २८७६.७५ विन्दुमा आइपुगेको छ । आज २२४ कम्पनीको ८ अर्ब ६१ करोड २१ लाख ७४ हजार १६२ रुपैयाँ बराबरको १ करोड ५७ लाख ८० हजार ७१३ कित्ता सेयर किनबेच भएको छ ।
आज कारोबारमा आएका १३ वटा समूहमध्ये हाइड्रोपावर र निर्जीवन बीमा समूह बाहेक बाँकी सबै समूहको परिसूचक राताम्मे भएको छ । हाइड्रोपावर समूह सबैभन्दा धेरै ०.१९ प्रतिशतले बढेको छ भने फाइनान्स समूह सबैभन्दा धेरै १.३१ प्रतिशतले घटेको छ ।
आज कारोबार भएका २२४ कम्पनीमध्ये ६० कम्पनीको सेयर मूल्य बढेको छ भने १५० कम्पनीको घटेको छ । १४ कम्पनीको मूल्य स्थिर रहेको छ ।
आज अरुण भ्याली हाइड्रोको सर्वाधिक कारोबार भएको छ । यसको ८२ करोड बढीको सेयर किनबेच भएको छ । त्यस्तै, अपी पावर ५२ करोड र शिखर इन्स्योरेन्स २६ करोड बढीको कारोबार हुँदै शीर्ष तीन कम्पनीमा रहे ।
दोहोरो अंकले घटेको बजारमा २ कम्पनीको सेयर मूल्यमा पोजेटिभ सर्किट लागेको छ । वीन नेपाल लघुवित्तको सेयर मूल्य ठ्याक्कै १० प्रतिशतले बढेको छ भने बुद्धभूकिका सेयरधनीले पनि करिब १० प्रतिशत कमाएका छन् ।
त्यसैगरी, साहस ऊर्जा ६.०६, अरुण भ्याली ५.३३, मैलुङ खोला ४.२५, न्यादी हाइड्रोपावर ४.१३, तेह्रथुम पावर, सिनर्जी पावर र सामुदायिक लघुवित्तको सेयर मूल्य ३ प्रतिशतभन्दा धेरै बढेको छ ।
घट्दो बजार आज आरएमडीसी लघुवित्तका सेयरधनीले सबैभन्दा धेरै ३.४९ प्रतिशत गुमाएका छन् ।
