काठमाडौं । सेयर बजारमा भीषण पहिरो गएको छ । आइतबार १० अंकले घटेको नेप्सेमा आज एकैदिन १०० अंकले घटेको हो ।
आज सूचकमा भारी गिरावट आए पनि कारोबार रकममा भने बढोत्तरी आएको छ । अघिल्लो दिनको तुलनामा कारोबार रकम झन्डै २ अर्बले बढेर पौने ९ अर्ब पुगेको छ ।
सोमबार नेप्से ९९.८६ अंकले घटेर २८२०.६६ विन्दुमा आइपुगेको छ । आज २२८ कम्पनीको ८ अर्ब ८८ करोड ८५ लाख १३ हजार १७८ रुपैयाँ बराबरको १ करोड ७० लाख ६३ हजार ८३३ कित्ता सेयर किनबेच भएको छ ।
आज कारोबार भएका २२८ कम्पनीमध्ये जम्मा ८ कम्पनीको सेयर मूल्य बढेको छ भने २१७ कम्पनीको घटेको छ । ३ कम्पनीको मूल्य स्थिर रहेको छ ।
तेहेरो अंकले घटेको बजारमा आज २ कम्पनीको सेयर मूल्यमा पोजेटिभ सर्किट लागेको छ । वीन नेपाल लघुवित्त र बुद्धभूमि नेपालको सेयर मूल्य ठ्याक्कै १० प्रतिशतले बढेको छ ।
त्यसैगरी, ज्योति लाइफ इन्स्योरेन्स १.८२ प्रतिशत, गोर्खा फाइनान्स १.५१, सानिमा लार्ज क्पाय फण्ड १.५०, जन उत्थान लघुवित्त ०.६०, सानिमा जनरल इन्स्योरेन्स ०.२४ र सिदार्थ बैंकको डिबेञ्चर ०.२० प्रतिशतले बढेको छ ।
