काठमाडौं । सिद्धबाबा सुरुङमार्ग निर्माणको लागि ४ वटा चिनियाँ कम्पनी सर्टलिष्टमा परेका छन् । सडक विभाग अन्तर्गत गुणस्तर अनुसन्धान विकास केन्द्रले आवेदन दिएका ९ कम्पनीमध्ये ४ कम्पनीको प्राविधिक प्रस्ताव पेश पास गरेको हो ।
गुणस्तर अनुसन्धान विकास केन्द्रले जेठ ९ गते पाल्पास्थित सिद्धबाबामा सुरुङ निर्माणका लागि बोलपत्र आह्वान गरेको थियो । उक्त बोलपत्रमा ९ कम्पनीले आवेदन दिएका थिए । सोमध्ये कोभेक/सीआरइजीसी जेभी, चाइना स्टेट इन्जिनियरिङ कर्पोरेशन लिमिटेड, चाइना फर्स्ट हाइवे इन्जिनियरिङ कर्पोरेशन लिमिटेड र सीसीइसीसी/सीआरसीसी १४-सियुयान जेभीको प्राविधिक प्रस्ताव पास भएको हो ।
केन्द्रका सिनियर डिभिजनल इन्जिनियर सौरभ बज्राचार्यले आगामी हप्ता प्राविधिक प्रस्ताव पास भएका ४ कम्पनीको आर्थिक प्रस्ताव खोलिने बताए । आर्थिक छनोटमा सबैभन्दा कम प्रस्ताव गर्ने कम्पनीलाई ठेक्का दिइने छ । उनका अनुसार आगामी फागुसम्ममा ठेक्का टुंगो लगाइ बजेट मोबिलाइजेशन गरिने छ ।
सुरुङमार्ग निर्माणका लागि १० अर्ब १५ करोड रुपैयाँ लगानी अनुमान गरिएको छ । छनोट हुने कम्पनीले ५ वर्षभित्र उक्त सुरुङ निर्माण गरिसक्नु पर्ने छ । निर्माण पछिको थप ५ वर्ष निर्माण कम्पनीले निर्माण क्षेत्रमा केही भए मर्मत सम्भार गर्नुपर्नेछ ।
पाल्पा–बुटवल सडक खण्डअन्तर्गत पर्ने जोखिम क्षेत्र सिद्धबाबामा इन्जिनियरिङ प्रोक्युरमेन्ट कन्स्ट्रक्सन (ईपीसी) मोडलमा सुरुङमार्ग निर्माण गर्न लागिएको हो । ईपीसी मोडलमा निर्माण गर्दा आयोजनाले दिएको बेसलाइ सर्भेका आधारमा विस्तृत डिजाइन, खरिद, निर्माण र तोकिएको समयसम्म सञ्चालन र मर्मतसम्भार समेत गर्नुपर्छ ।
सुरुङमार्गका लागि स्वीस एजेन्सी फर डेभलपमेन्ट एण्ड कर्पोरेशन (एसडीसी) को आर्थिक र प्राविधिक सहयोगमा एक वर्ष लगाएर सुरुङमार्गको बेसलाइन सर्भे गरिएको छ ।
उक्त सुरुङमार्ग एसियन हाइवे स्ट्याण्डर्डमा १.१२६ किलोमिटर निर्माण हुनेछ । सिद्धार्थ राजमार्गको बुटवल–तानसेन खण्डमा सिद्धबाबाको मन्दिरको उत्तरतर्फ चिडियाखोला नजिकै सुरुङमार्गको एउटा पोर्टल रहनेछ । चिडियाखोलाको खोँच हुँदै दोभान नजिकै निस्कने छ । सुरुङमार्गभित्र इमर्जेन्सी क्रस प्यासेज, टनेल भेन्टिलेसन,लाइटिङ, मनिटरिङ सिस्टम लगायत हुने बताइएको छ।
सुरुङमार्गसँगै रक सेट निर्माणको पनि योजना रहेको छ । ’रक सेट’ पैदल यात्रु आवागमनका लागि हुनेछ । उक्त रक सेटमा आकस्मिक अवस्थामा त्यसबाट एम्बुलेन्स जस्ता अत्यावश्यक सवारी साधन चलाउन सकिनेछ । सुरुङमार्गसँगै बाहिर करिब ७८० मिटरको रक सेट बनाउन लागिएको हो ।
