काठमाडौं । कृषि प्रधान देशको रुपमा परिचित हाम्रो देश नेपालमा दैनिक तरकारीको मूल्य घटबढ भइनै राख्छ । अझ भन्ने हो भने विशेष चाडपर्वको बेला तरकारीको मूल्य आकाशिने गरेका छन् भने चाडपर्व सकिना साथ तरकारीको मूल्य ह्वातै घट्ने गरेका छन् ।

व्यापारीहरुले समेत चाडवाडको मौका छोपेर तरकारीको मूल्य बढाउने गरेका छन् । यसो गर्दा सधैं उपभोक्ता मारमा पर्ने गरेका छन् । यस विषयमा अहिलेसम्म सरकारले केही गर्न सकेको छैन ।

भान्छामा प्रयोग हुने दैनिक उपभोग्य कृषि उपजहरुमा यसरी चाडवाडमा विशेष गरी मूल्य बढ्दा उपभोक्ता चर्काे मूल्य वृद्धि व्यहोर्नु परेको देखिन्छ । कालिमाटी फलफूल तथा तरकारी विकास समितिको तथ्यांक अनुसार चाडपर्वको बेला तरकारीको मूल्यमा न्यूनतम ११ प्रतिशतदेखि अधिकतम ७३ प्रतिशतसम्म उतरचडाव हुने गरेको छ ।

साउन १ गतेसम्म कालिमाटी बजारमा बोडीको थोक (होलसेल) मूल्य १ सय १५ रुपैयाँ केजी रहेको थियो । तीज सकिए लगतै बोडीको मूल्य घट्दोक्रममा रहेको छ । बिहीबार बिहान बोडीको थोक मूल्य प्रतिकेजी ३० रुपैयाँ रहेको थियो । तथ्यांक अनुसार बोडीको मूल्य ७३ प्रतिशतले घटेको हो । खुद्रा बजारमा बोडीको मूल्य १ सय ४० रुपैयाँबाट ५५ रुपैयाँ प्रतिकेजीमा झरेको छ ।

भिण्डीको साउन १ गते कालिमाटी बजारमा होलसेल मूल्य ९८ रुपैयाँ रहेको थियो भने आजसम्म आइपुग्दा यसकोे मूल्य ३३ रुपैयाँ प्रतिकेजी रहेको छ । डेढ महिनाको अवधिमा यसको मूल्य ६६ प्रतिशतले घटेको छ । खुद्रा बजारमा भिण्डीको मूल्य १ सय २५ रुपैयाँ प्रतिकेजी थियो भने आज ६५ रुपैयाँसम्ममा विक्री भइरहेको छ ।

लौकाको मूल्य साउन १ गते ७८ रुपैयाँ प्रतिकेजी होलसेलमा विक्री भइरहेको थियो । आजसम्म आइपुग्दा यसकोे मूल्य होलसेल बजारमा प्रतिकेजी २८ रुपैयाँमा झरेको छ । खुद्रा बजारमा लौकाको मूल्य ९५ रुपैयाँ प्रतिकेजीबाट ५५ रुपैयाँमा आइपुगेको छ ।

घिउ सिमी र मकै बोडीमा भने ६३ प्रतिशतसम्म मूल्य गिरावट आएको छ । साउन १ गतेसम्म कालिमाटी बजामा घिउ सिमी प्रतिकेजी १ सय १५ रुपैयाँमा थोक बजारमा विक्री भइरहेको थियो । आज घिउ सिमीको मूल्य घटेर प्रतिकेजी ४२ रुपैयाँ पुगेको छ ।खुद्रा बजारमा घिउ सिमीको मूल्य साउन पहिलो सातामा प्रतिकेजी १ सय ४५ रुपैयाँ रहेको थियो भने आज ८५ रुपैयाँमा किनबेच भइरहेको छ ।

यस्तै, मकै बोडी १ सय ५ केजी बाट घटेर ३८ रुपैयाँ प्रतिकेजीमा पुगेको छ । कालिमाटीको थोक मूल्यमा मकै बोडीको मूल्य ६३ प्रतिशतले घटेको हो । खुद्रा बजारमा यसको मूल्य १ सय ४० रुपैयाँ प्रतिकेजीबाट ६५ रुपैयाँ प्रतिकेजीमा झरेको छ ।

भन्टा र घिरौलाको मूल्य ५७ पतिशतले घटेको छ । कालिमाटीको थोक बजारमा साउन १ गतेसम्ममा भन्टा र घिरौला प्रतिकेजी ७८ रुपैयाँमा विक्री भइरहेको थियो भने हाल ३३ रुपैयाँ प्रतिकेजीसम्ममा झरेको छ । खुद्रा बजारमा भन्टा र घिरौला १ सय ५ बाट झरेर ५५ रुपैयाँमा विक्री भइरहेको छ ।

गोलभेडा र स्कूसको होलसेल मूल्य ५४ पतिशतले घटेको छ । गोलभेडाको होलसेल मूल्य साउन १ गते ९८ रुपैयाँ प्रतिकेजी रहेको थियो भने आज आईपुग्दा गोलभेडा प्रतिकेजी ४५ रुपैयाँमा झरेको छ । खुद्रा बजारमा गोलभेडा १ सय २५ बाट ७५ रुपैयाँमा विक्री भइरहेको कालिमाी बजारले जानकारी दिएको छ । स्कूसको होलसेल मूल्य ४८ रुपैयाँबाट झरेर २२ रुपैयाँ प्रतिकेजीपुगेको छ । खुद्रा बजारमा स्कूस ६५ देखि ४५ रुपैयाँमा झरेको छ ।

हरियो प्याज साउन १ गते सम्म १ सय ३५ प्रतिकेजी रहेको थियो भने भदौ १९ गतेसम्म आईपुग्दा ६५ रुपैयाँ प्रतिकेजीमा झरेको छ । हरियो प्याजको मूल्य ५१ प्रतिशतले घटेको हो । खुद्रा बजारमा हरियो प्याकज साउन पहिलो साता १ सय ९० रुपैयाँ केजीसम्म थियो भने हाल ७५ रुपैयाँ प्रतिकेजी पुगेको छ ।

तितोकरेलाको थोक मूल्य कालिमाटी बजारमा प्रतिकेजी ५८ बाट घटेर ३३ रुपैयाँमा झरेको छ । खुद्रा बजारमा तितो करेला ८५ रुपैयाँ प्रतिकेजीबाट ५५ रुपैयाँमा झरेको हो ।

चिचिण्डोको मूल्य कालिमाटीको होलसेल बजारमा प्रतिकेजी ४८ रुपैयाँ थियो भने हाल २८ रुपैयाँमा झरेको छ । खुद्रा बजारमा चिचिण्डो प्रतिकेजी ७५ बाट ४५ रुपैयाँ मा झरेको छ ।

हरियो फर्सि होलसेल बजारमा ५८ रुपैयाँबाट २८ रुपैयाँ झरेको छ । खुद्रा बजारमा हरियो फर्सिको मूल्य ८५ रुपैयाँ पतिकेजी साउन सम्ममा विक्री भइरहेको थियो भने आज ७५ रुपैयाँ प्रतिकेजी पुगेको छ ।

मूलाको होसेल मूल्य ५८ रुपैयाँबाट ३८ रुपैयाँ प्रतिकेजीमा झरेको छ । ख्द्रा बजारमा मूला प्रतिकेजी ८५ रुपैयाँबाट ६५ रुपैयाँ प्रतिकेजी पुगेको छ ।