काठमाडौं । आर्थिक वर्ष २०७५/७६ को ११ महिना (जेठ मसान्तसम्म) मा ७ खर्ब ९९ अर्ब रेमिट्यान्स नेपाल भित्रिएको छ।
नेपाल राष्ट्र बैंकको तथ्यांकअनुसार गत आर्थिक वर्ष अघिल्लो वर्षको तुलनामा १७ प्रतिशतले बढी रेमिट्यान्स भित्रिएको छ । अघिल्लो वर्षको यसै अवधिको ६ खर्ब ६५ अर्ब रेमिट्यान्स भित्रिएको थियो ।
पछिल्लो समय औपचारिक माध्यमबाट पैसा पठाउने क्रम बढेकाले पनि रेमिट्यान्सको वृद्धि उच्च देखिएको राष्ट्र बैंकले जनाएको छ । विशेष गरी भारत, कोरियालगायतका देशबाट औपचारिक माध्यममार्फत रकम आउन थालेकोले रेमिट्यान्समा उच्च वृद्धि देखिएको हो।
राष्ट्र बैंकको तथ्यांकअनुसार नेपालमा अमेरिकाबाट सबैभन्दा धेरै रेमिट्यान्स भित्रिएको छ । गत आर्थिक वर्ष अमेरिकाबाट मात्रै १ अर्ब ६४ करोड डलर (करिब १ खर्ब ८३ अर्ब रुपैयाँ) रेमिट्यान्सको रूपमा भित्रिएको छ।
नेपालमा पैसा पठाउने मुलुकको सूचीमा भारत दोस्रो स्थानमा भारत रहेको छ । तथ्यांकअनुसार भारतबाट ८१ करोड डलर रेमिट्यान्स भित्रिएको छ।
त्यस्तै, साउदी अरेबियाबाट ७८ करोड, यूएईबाट ७४ करोड, मलेसियाबाट ६५ करोड, जापानबाट ५८ करोड रोमानियाबाट ४९ करोड डलर रेमिट्यान्स भित्रिएको छ।कोरिया, बहराइन र कतार पनि नेपालमा रेमिट्यान्स पठाउने मुलुकको शीर्ष दश भित्र रहेका छन् ।
राष्ट्र बैंकको तथ्यांकअनुसार नेपालीलाई जान प्रतिबन्ध लगाइएका इराक, लेवनान जस्ता मुलुकबाट समेत उच्च रकम रेमिट्यान्सका रुपमा आउने गरेको छ। इराकबाट गत आर्थिक वर्ष ८७ लाख र लेबनानबाट २४ लाख ८३ हजार अमेरिकी डलर रेमिट्यान्स भित्रिएको छ।
