काठमाडौं । महिला लघुवित्त वित्तीय संस्थाले आर्थिक वर्ष २०७७/७८ को मुनाफाबाट घोषणा गरेको लाभांश परिमार्जन गरेको छ ।
नियामक निकाय नेपाल राष्ट्र बैंकको निर्देशन अनुसार लघुवित्तले लाभांशदर परिमार्जन गरेको हो । संशोधित लाभांश अनुसार सेयरधनीले पाउने बोनस सेयर बढेको छ भने नगद घटेको छ । कुल लाभांश भने यथावत रहेको छ ।
लघुवित्तले यसअघि ४५ प्रतिशत बोनस सेयर र ५ प्रतिशत नगद घोषणा गरेकोमा अब ४७.५ प्रतिशत बोनस सेयर र कर प्रयोजनका लागि २.५ प्रतिशत नगद दिने भएको छ ।
लघुवित्तले प्रस्ताव गरेको लाभांश नियामक निकाय नेपाल राष्ट्र बैंकको स्वीकृति र कम्पनीको आगामी वार्षिक साधारण सभाबाट पारित भएपछि सेयरधनीहरुले पाउनेछन्।
हाल १० करोड चुक्ता पूँजी रहेको लघुवित्तको बोनस वितरणपछि चुक्ता पूँजी १४ करोड ७० लाख रुपैयाँ पुग्नेछ ।
