काठमाडौं । नेपाल राष्ट्र बैंकले असोज ४ गतेदेखि दशैंका लागि नयाँ नोट वितरण गर्ने भएको छ ।
राष्ट्र बैंकका अनुसार असोज ४ देखि बालुवाटार कार्यालय र प्रदेश स्थित प्रादेशिक कार्यालयबाट सर्वसाधरणलाई नयाँ नोट वितरण गर्ने भएको हो ।
हरेक वर्ष दशैंमा नयाँ नोट वितरण गर्दै आएको राष्ट्र बैंकले गत वर्ष भने कोरोनाका कारण वितरण गरेको थिएन । यस वर्ष कोरोना संक्रमण घटेकाले नयाँ नोट वितरण गर्न लागेको पछि राष्ट्र बैंकले जनाएको छ ।
एक व्यक्तिले अधिकतम् १८ हजार ५०० रुपैयाँका दरले नयाँ नोट पाउने राष्ट्र बैंकले जनाएको छ । एक व्यक्तिले ५, १०, २०, ५० र १०० रुपैयाँ दरका एक/एक बन्डल नयाँ नोट पाउने छन् ।
राष्ट्र बैंकले यसअघि नै बैंक तथा वित्तीय संस्थाहरुलाई भने नयाँ नोट उपलब्ध गराइसकेको छ । बैंकहरुले आफ्ना खास ग्राहकहरुलाई नयाँ नोट वितरण गर्न शुरु गरिसकेका छन् । यद्यपि, थोरै नोट आएको भन्दै सबै ग्राहकलाई भने दिने गरेका छैनन् ।
