काठमाडौं । ऋण लगानी गर्दा बैंकहरुले कर्णाली प्रदेश सबैभन्दा कम प्राथमिकतामा परेको देखिएको छ । नेपाल राष्ट्र बैंकले सार्वजनिक गरेको प्रादेशिक आर्थिक गतिविधि अध्ययन प्रतिवेदन (कर्णाली प्रदेश)को तथ्यांकले यस्तो देखाएको हो ।
प्रतिवेदन अनुसार गत आर्थिक वर्ष २०७७/७८ मा कर्णालीमा बैंकहरुले कुल ४२ अर्ब ६४ करोड ऋण लगानी गरेका छन् । यो बैंकहरुले गत आवसम्ममा गरेको कुल ऋण लगानीको जम्मा १.१६ प्रतिशत हो । गत आवमा बैंकहरुले कुल ३६ खर्ब ५४ अर्ब ऋण लगानी गरेका थिए ।
बैंकहरुले कर्जा लगानी लागि वाग्मती प्रदेश पहिलो रोजाइमा परेको छ । यस प्रदेशमा मात्रै बैंकहरुले कुल ऋण लगानीको ५७ प्रतिशत अर्थात् २० खर्ब १८ अर्ब ऋण लगानी गरेका छन् ।
यसैगरी, बैंकहरुले प्रदेश १ मा ४ खर्ब १७ अर्ब, प्रदेश २ मा ३ खर्ब ९ अर्ब, गण्डकीमा २ खर्ब ७६ अर्ब, लुम्बिनीमा ४ खर्ब १७ अर्ब र सुदूरपश्चिम प्रदेशमा १ खर्ब १० अर्ब ऋण लगानी गरेका छन् ।
