काठमाडौं । सानिमा लाइफ इन्स्योरेन्सको प्राथमिक साधरण सेयर (आइपीओ) सेयरधनीको खातामा जम्मा भएको छ ।
सीडीएससीले आइतबारदेखि लगानीकर्ताको डिम्याट खातामा सेयर पठाउन थालेको हो । कम्पनीको सेयरले कारोबारका लागि एसएलआइ (SLI) संकेत चिह्न पाएको छ ।
कम्पनीले साउन २० गतेदेखि प्रतिकित्ता १०० रुपैयाँदरले ६० करोड रुपैयाँ बराबरको ६० लाख कित्ता आइपीओ निष्काशन गरेको थियो ।
निष्काशन गरिएको ६० लाख कित्तामध्ये सामूहिक लगानी कोष र इन्स्योरेन्सका कर्मचारीका लागि समान ३३ लाख कित्ता र सर्वसाधारणका लागि ५४ लाख कित्ता छुट्याइएको थियो ।
कम्पनीको आइपीओमा २४ लाख बढीले आवेदन दिएका थिए । जसमा गोलाप्रथाबाट भाग्यमानी ५ लाख ४० हजारले १० कित्ताका दरले सेयर पाएका थिए ।
अब कम्पनीको सेयर नेपाल स्टक एक्स्चेञ्ज (नेप्से)मा सूचीकृत भएपछि दोस्रो बजारमा कारोबारमा आउने छ । यसैहप्ता भित्र सेयर नेप्सेमा सूचीकृत गर्ने तयारी गरिएको कम्पनीले जनाएको छ । नेप्सेमा सूचीकृत भएको भोलिपल्टदेखि लगानीकर्ताले दोस्रो बजारमा सेयर कारोबार गर्न सक्नेछन् ।
