काठमाडौं । कृषि प्रधान मुलुक भनिए पनि नेपालमा खाद्यान्न आयत वर्षेनी बढ्दै गएको छ । गत वर्ष मात्रै करिब २ खर्ब बढीको चामल, दाल, गेडागुडी लगायत खाद्यान्य आयात भएको तथ्यांक्ले देखाएको छ ।
यसैक्रममा, एक वर्षको अवधिमा साढे २१ अर्ब बढीको गेडागुडी आयात भएको छ । भन्सार विभागको तथ्यांक अनुसार गत वर्ष आर्थिक वर्ष २०७७/७८ मा कुल २१ अर्ब ६३ करोड ४९ लाख रुपैयाँ बराबरको गेडागु्डी आयात भएको छ ।
उक्त रकममा कुल २८ करोड ६२ लाख केजी गेडागुडी आयात भएको विभागले जनाएको छ । सो आयातका क्रममा सरकारले २ अर्ब ३० करोड ५७ लाख रुपैयाँ राजश्व संकलन गरेको थियो ।
गत वर्ष अघिल्लो आवकोभन्दा करिब साढे ३ अर्ब बढीको गेडागुडी आयात भएको विभागको तथ्यांकले देखाएको छ । अघिल्लो आव २०७६/७७ मा १८ अर्ब १९ करोड ५० लाख रुपैयाँ बराबरको गेडागुडी आयात भएको थियो । सो आवमा ३३ करोड ९९ लाख केजी गेगागुडी आयात भएको थियो ।
यसरी आयात हुने क्रममा केराउ, चना, भटमास, राजमा, बोडी लगायतका विभिन्न गेडागुडीहरू रहेका छन् । गत वर्ष नेपालमा केराउ ३ अर्ब २६ करोड ८६ लाख रुपौयाँ बराबरको ५ करोड ८५ लाख १९ हजार केजी केराउ आयात भएको हो ।
यसैगरी, ३ अर्ब ६४ करोड ९२ लाख रुपैयाँ बराबरको ५ करोड १७ लाख ७८ हजार केजी चना, ४ अर्ब ६७ करोड ५२ लाख रुपैयाँको ४ करोड ७२ लाख केजी बोडी, २१ करोड ३६ लाख रुपैयाँ बराबरको २५ लाख १३ हजार केजी र ७ अर्ब बराबरको अन्य गेडागुडी आयत भएको विभागको तथ्यांकले देखाएको छ ।
