काठमाडौं । अब मेरो सेयरको पासवर्ड बिर्सिएमा लगानीकर्ताले आफैं परिवर्तन गर्न सक्ने भएका छन् ।
केन्द्रीय निक्षेप प्रणाली (सीडीएससी)ले मेरो सेयरमा पासवर्ड परिवर्तन गर्न सक्ने (फरगेट योर पासवर्ड) फिचर थपेसँगै आफैं पासवर्ड परिवर्तन गर्न सकिने भएको हो ।
सीडीएससीले शुक्रबारदेखि मेरो सेयरको वेबसाइटमा उक्त फिचर थप गरेको हो । फिचर थप गरेसँगै सर्वसाधारणले अब आँफै पासवर्ड परिवर्तन गर्न सक्ने छन् ।
यस अघि भने पासवर्ड बिर्सिएमा सर्वसाधारणले निक्षेप सदस्य पासवर्ड परिवर्तन गर्न अनुरोध गर्नुपर्ने स्थिति रहेको थियो ।अब भने लगानीकर्ता यो झन्झटबाट मुक्त भएका छन् ।
कसरी गर्ने पासवर्ड परिवर्तन ?
यदि, कसैले मेरो सेयरको पासवर्ड बिर्सिएमा सबैभन्दा पहिले मेरोसेयरको स्क्रीनमा देखिने फरगेट पासवर्डमा क्लिक गर्नुपर्छ ।
उक्त फिचरमा क्लिक गरेपछि लगानीकर्ताले आफ्नो निक्षेप सदस्य (डिम्याट खाता खोलेको संस्था)नाम, आफ्नो युजर नेम, इमेल र जन्म मिति इन्ट्री गरी सेन्ड गुर्नपर्नेछ ।
त्यसपछि सिस्टमले पासवर्ड परिवर्तन भएको जानकारी र परिवर्तन भएको पासवर्ड इमेलमा पठाउँछ । इमेलमा आएको पासवर्ड प्रयोग गरी खाता चलाउन सक्ने सीडीएससीले जनाएको छ ।
