काठमाडौं । होन्डाले रेट्रो डिजाइन सीबी ३५० आरएस नेपालमा सार्वजनिक गरेको छ । स्याकार ट्रेडिङले नयाँ मोटरसाइकल हालै विक्री शुरु गरेको हो । होन्डा सीबी आरएसको मूल्य ७ लाख ७५ हजार रुपैयाँ निर्धारण गरेर विक्री शुरु भएकाे हाे ।
असार पहिलो साता कम्पनीले हाइनेस सीबी ३५० नेपाल ल्याएको थियो । सिबी हाइनेसको सफलताबाट उत्साहित बनेको कम्पनीले रेट्रो डिजाइनमा नयाँ मोटरसाइकल साउन सीबी ३५० आरएसको नेपालमा विक्री शुरु गरेको छ ।
सीबी ३५० आरएस मोर्डन डिजाइनमा आएको रेट्रो क्लासीक मोटरसाइकल हो । यो मोटरसाइकलमा सीबी ३५० हाइनेसका अधिकांश फिचर प्रयोग भएको छ ।
यो मोटरसाइकलमा ३४८ सीसी सिंगल सिलिन्डर, एयरकुल्ड, एफआई इन्जिन रहेको छ । यो इन्जिनले ५५०० आरपीएममा अधिकतम २०.८ बीएच पावर तथा ३००० आरपीएममा अधिकतम ३० एनएम टर्क जेनेरेट गर्छ । यसमा ५ स्पीडको गियर बक्सका साथै मल्टिप्लेट वेट क्लच उपलब्ध रहेको छ ।
सीबी ३५० आरएसको लम्बाई २१७१ एमएम, चौडाई ८०४ एमएम, उचाई १०९७ एमएम, ह्वीलबेस १४४१ एमएम, सिट हाइट ८०० एमएम रहेको छ । यो मोटरसाइकलको ग्राउन्ड क्लियरेन्स १६८ एमएम छ । उच्च ग्राउन्ड क्लियरेन्स र एपस्व्यप्ट एक्जष्टले यो मोटरसाइकलाई अफरोडका लागि समेत उपर्युक्त बनाएको छ ।
त्यसैगरी यो मोटरसाइकलमा हाल्फ डुप्लेक्स कार्डल फ्रेमको प्रयोग गरिएको छ भने, अगाडि टेलिस्कोपिक र पछाडि ट्वीन हाइड्रोलिक सस्पेन्सन दिइएको छ । यसमा १९ इन्चको फराकिलो टायर र दुबै चक्कामा डिस्क ब्रेक पाउन सकिन्छ ।
सीबी ३५० आरएसमा सबै किसिमका लाइट एलइडी प्रयोग भएको छ । सेमी डिजिटल कन्सोल, ब्लुटुथ कनेक्ट फिचर, असिस्ट सिल्पर क्लच, डबल च्यानल एबीएस, स्मार्टफोन भ्वाइस कन्ट्रोल, साइड स्ट्यान्ड सेन्सर, ड्यूल टोन पेन्ट, हार्जाड लाइट जस्ता फिचरले मोटरसाइकललाई उत्कृष्ट बनाएको छ ।
