काठमाडौं । किसान लघुवित्त वित्तीय संस्थाले थप मूल्यमा सेयर (एफपीओ) जारी गर्न अनुमति मागेको छ । लघुवित्तले १२ लाख ९८ हजार २५९.४९ कित्ता एफपीओ जारी गर्न अनुमति माग्दै नेपाल धितोपत्र बोर्डमा आवेदन दिएको हो ।
लघुवित्तले १०० रुपैयाँ अंकित मूल्यमा २५ रुपैयाँ प्रिमियम जोडेर प्रतिकित्ता १२५ रुपैयाँदरले १६ करोड २२ लाख ८२ हजार ४३६ रुपैयाँ बराबरको सेयर जारी गर्न माग गरेको हो ।
अब बोर्डको अनुमतिपछि एफपीओ जारी गर्ने कम्पनीले जनाएको छ । कम्पनीले एफपीओ जारी गर्न यसअघि नै रेटिङ समेत गराइसकेको छ ।
कम्पनीको एफपीओलाई रेटिङ एजेन्सी केयर रेटिङ नेपालले ‘केयर एनपी बीबी माइनस (डबल बी माइनस)’ रेटिङ प्रदान गरेको छ । यसले कम्पनीको आधारभूत अवस्था र वित्तीय दायित्व वहन गर्ने क्षमता औसत मध्यम जोखिम रहेको जनाउँछ ।
यस्तै, एफपीओ जारी गर्न लघुवित्तले यसअघि नै मुक्तिनाथ क्यापिटललाई विक्री प्रबन्धकमा नियुक्त गरिसकेको छ ।