कतार एयरवेज बन्यो विश्वकै उत्कृष्ट एयरलाइन्स कम्पनी, यी हुन् संसारका उत्कृष्ट १० एयरलाइन्स
चाणक्य पोष्ट
प्रकाशित : 4:47 pm, बुधबार, साउन ६, २०७८

काठमाडौं । कतार एयरवेज विश्वकै उत्कृट एयरलाइन्स कम्पनी बनेको छ । एयर न्यूजील्याण्डलाई पछि पार्दै कतार एयर सन् २०२१ को उत्कृट एयरलाइन्स कम्पनी बनेको हो ।

 

एयरलाइन्स रेटिङ डटकम वेबसाइटले सार्वजनिक गरेको २०२१ का उत्कृष्ट एयरलाइन्सको सूचीमा कतार शीर्ष स्थानमा परेको हो ।

 

एयरलाइन्स रेटिङ डटकमले यात्रुहरुले गरेको रिभ्यू, अफर र उडान अवधिका आधारमा एयरलाइन्स एक्सलेन्स अवार्डको समेत घोषणा गरेको छ । एयरलाइन्स रेटिङ डट कमले सामान्यतया एयरलाइन्सको रेटिङ नोभेम्बर महिनामा सार्वजनिक गर्ने गरेको भए पनि कोरोना महामारीका कारण विश्वकै परिस्थिति बदलिएकोले जुलाई महिनामा सार्वजनिक गरेको जनाएको छ ।

 

त्यस्तै, उत्कृष्ट एयरलाइन्सको सूचीमा सिंगापुर एयरलाइन्स तेस्रो स्थानमा छ । सिंगापुर एयरलाइन्सले २०१९ मा उत्कृष्ट एयरलाइन्सको उपाधि जितेको थियो । त्यस्तै, अस्ट्रियाको क्वान्टास एयरलाइन्स चौथो, दुबईको इमिरेट्स पाँचौं, हङकङको काथे प्यासिफिक छैटौं, भर्जिन एटलान्टिक, युनाइटेड एयरलाइन्स, इभा एयर र ब्रिटिश एयरवेज क्रमशः शीर्ष दशमा परेका छन् ।

 

यस्तै, एयरलाइन्स डटकमले सिंगापुर एयरलाइन्सलाई बेस्ट फस्ट क्लासको अवार्ड दिएको छ भने भर्जिन अस्ट्रेलिया एयरलाइन्सलाई बेस्ट क्याबिन क्रु को अवार्ड दिएको छ । त्यस्तै बेस्ट एयरपोर्ट लाउन्जको अवार्ड क्वान्टासले जितेको छ ।

 

त्यसैगरी युरोपको उत्कृष्ट बजेट एयरलाइन्समा इजिजेटले अवार्ड पाएको छ भने जेटस्टारले एसिया प्यासिकको उत्कृष्ट बजेट एयरलाइन्सको अवार्ड जितेको छ । त्यस्तै अमेरिकी क्षेत्रबाट साउथेष्ट एयरलाइन्सले उत्कृष्ट बजेट एयरलाइन्सको अवार्ड जितेको छ ।एजेन्सी