काठमाडौं । नेपालमै पहिलोपटक कंलकी–कोटेश्वर सडकखण्ड अन्तर्गत ललितपुरको ग्वार्को चोकमा चार लेनको फ्लाइओभर बन्ने भएको छ । सडक विभागले सोमबार टेन्डर निकालेसँगै यो फ्लाइओभर बन्ने निश्चित भएको हो ।
उक्त आह्वान टेन्डरमा नेपाली निर्माण कम्पनीले मात्रै सहभागी जनाउन सक्नेछन् । ठेक्का पाउने कम्पनीले २ वर्षभित्र फ्लाइओभर बनाई विभागलाई हस्तान्तरण गर्नु पर्नेछ ।
ठेक्का पाउने कम्पनीले डिजाइनदेखि निर्माण सम्पन्न अर्थात् इन्जिनीयरिङ प्रक्युरमेन्न्ट कन्स्ट्रक्शन (ईपीसी) ढाँचामा निर्माण गर्ने छ ।
फ्लाइओभर भनिए पनि विकसित देशमा जस्तो जटिलखाले संरचना नभई साधारण खालको ३५ मीटरको पुल बनाउने भएको छ । त्यसका लागि नेपाली कम्पनीहरू नै सक्षम भएकाले यस्तो ठेक्का निकालिएको केन्द्रका निर्देशक डा.विजय जैशीले जानकारी दिए ।
विभाग अन्तर्गतको गुणस्तर अनुसन्धान तथा विकास केन्द्रका अनुसार ठेक्का पाउने कम्पनीले डिजाइनदेखि निर्माण सम्पन्न अर्थात् इन्जिनीयरिङ प्रक्युरमेन्न्ट कन्स्ट्रक्शन (ईपीसी) ढाँचामा निर्माण गर्ने छ ।
फ्लाइओभरले काठमाडौं उपत्यकामा बढ्दो सवारी चाप र ट्राफिक व्यवस्थापन चुनौलाई केही समाधान गर्ने अनुमान गरिएको छ ।
यस अघि पनि चक्रपथको कोटेश्वर–कलङ्की खण्डको एकान्तकुना, ग्वार्को तथा सातदोबाटो र चापागाउँ चोकलाई जोडेर ‘फ्लाई ओभर’ निर्माण गर्न आवश्यक प्रक्रिया अगाडि बढाइएको सडक विभाग अन्तर्गतको, गुणस्तर अनुसन्धान विकास केन्द्रकाका पूर्व निर्देशक शिव नेपालले बताएका थिए ।
सो समयमा चक्रपथमा ‘फ्लाई ओभर’ निर्माण निम्ति सर्वे तथा डिजाइनका लागि परामर्शदाता चयन गर्ने क्रममा रहेको बताइएको थियो । विगतमा सो फ्लाइओभर जापानी कम्पनी जाइकाले नै सर्भे गरेको थियो ।
हाल गुणस्तर अनुसन्धान केन्द्रका निर्देशक विजय जैशीले फ्लाई ओभर निर्माणका लागि नेपालकै जनशक्ति दक्ष भएको भन्दै नेपाली कम्पनीलाई नै ठेक्का दिने बताएका छन् ।
‘यो फ्लाइओभर विदेशमा भए जस्तो हुन्न, त्यसैले नेपाली कामदारले नै बनाउन लागेका हुन्, हामीसँग दक्ष कामदार पनि छन्,’ जैशीले भने ।
आगामी आर्थिक वर्ष २०७८/७९ को बजेट वक्तव्यमा समेत चक्रपथका तीन स्थानमा नेपालकै पहिलो ‘फ्लाइओभर’ निर्माण गरिने भनेर उल्लेख गरिएको छ ।
त्यसैगरी काठमाडौँको तीनकुने–कोटेश्वर–जडीबुटी खण्डमा सम्भाव्यता अध्ययन पूरा गरी ‘फ्लाइओभर’ तथा सुरुङ मार्ग निर्माण प्रारम्भ गर्न तथा नयाँ बानेश्वरमा अन्डर पास र त्रिपुरेश्वरदेखि माइतीघरसम्म सवारी आवागमन सहज गर्न उपयुक्त विकल्प पहिचान गरी निर्माण शुरु गरिने वक्तव्यमा उल्लेख छ । सो फ्लाइओभरका लागि बजेट विभियोजन भए पनि कुनै काम हुन सकेको छैन ।
