काठमाडौं । बाढी पहिरोका कारण पुगेको क्षति बापत करिब २ अर्बको बीमा दाबी परेको छ । मनसुन शुुरु भएयता आएको बाढी पहिरोका कारण अर्बौको क्षति भए पनि बीमा गरिएका धनजनको मात्र उक्त रकम बराबरको दाबी परेको हो ।
बीमा समितिका अनुसार हालसम्म कुल १ अर्ब ९२ करोड ३ लाख ४८ हजार रुपैयाँ बराबरको बीमा दाबी परेको छ । सो अवधिमा सम्पत्ति बीमा, मोटर बीमा, कृषि तथा पशुपंक्षी बीमा, इञ्जीनियरिङ बीमा र विविध बीमा अन्तर्गत बीमितबाट ३३१ वटा बीमा दाबी परेका छन् ।
जसमध्ये निर्माणाधीन आयोजना बीमाको मागदाबी ९० करोड ७ लाख ३४ हजार, निर्माण सम्पन्न आयोजनाको ११ करोड ७० लाख, हेभी इक्वीपमेन्ट बीमाको ८ करोड ८४ लाख ३६ हजार र अन्य शीर्षकमा १ करोड ५३ लाख ३ हजार रुपैयाँ बराबरको बीमा दाबी परेको समितिको तथ्यांक छ । अवधिमा इञ्जीनियरिङ बीमा अन्तरगत १०७ वटा दाबी परेका छन् ।
सबै निर्जीवन बीमा कम्पनीमा परेका कुल बीमा दाबीमध्ये १४१ वटा सम्पत्ति बीमाका छन् । ती दाबी उपर ६९ करोड ३६ लाख ४६ हजार रुपैयाँ बीमा दाबी भएको छ ।
यस्तै, मोटर बीमाका ३३ वटा दाबीमा ४ करोड ७५ लाख ८९ हजार, सामुद्रिक बीमाका ५ वटा दाबीमा १९ लाख ८१ हजार, कृषि बीमाका ६ वटा दाबीमा १ करोड ६२ लाख ५१ हजार, पशुपंक्षी बीमाका ५ वटा दाबीमा २ करोड ३८ लाख ५९ हजार रुपैयाँ र विविधतर्फका २ वटा दाबीमा १ करोड ५५ लाख ५१ हजार रुपैयाँ माग भएको समितिले जनाएको छ ।
