काठमाडौं । अब सेयर खरिद विक्री गर्दा १० पैसामा बार्गेनिङ गर्न पाइने भएको छ । नेपाल धितोपत्र बोर्डले धितोपत्र कारोबार संचालन विनियमावली २०७५ को दोस्रो संशोधन गर्दै यस्तो व्यवस्था गरेको हो ।
हाल सेयर कारोबार गर्दा रहेको न्यूनतम सीमा १ रुपैयाँलाई परिवर्तन गर्दै बोर्डले १० पैसा कायम गर्न लागेको हो । प्रिसेसनमा धितोपत्रको कारोबारमा हुने अस्वभाविक उत्तरुचढावलाई नियन्त्रण गर्न यस्तो व्यवस्था गरिएको बोर्डले जनाएको छ ।
यस्तै, बोर्डले प्रिसेसनमा कारोबार गर्दा २ प्रतिशतभन्दा धेरै मूल्य घटाउन/बढाउन नपाउने व्यवस्था गरेको छ । हाल प्रिसेसनमा एकैचोटी ५ प्रतिशत थप/घट गरेर कारोबार गर्न पाउने व्यवस्था छ ।
परिवर्तन गरिएका व्यवस्था आवश्यक प्रक्रिया मिलाई नेपाल स्टक एक्स्चेन्ज (नेप्से)ले कार्यान्वयनमा ल्याउन बोर्डले जनाएको छ ।
