काठमाडौं । लगानी बोर्डले दुई जलविद्युत् आयोजनाका लागि करिब ९७ अर्ब रुपैयाँ बराबरको लगानी स्वीकृत गरेको छ । मंगलबार प्रधानमन्त्रीको अध्यक्षतामा बसेको लगानी बोर्डको ४७औं बोर्ड बैठकले ४२४ मेगावाट बराबरका दुई जलविद्युत् आयोजनाका लागि ९७ अर्ब रुपैयाँ लगानी स्वीकृति गरेको हो ।
लगानी बोर्डका अनुसार २८५ मेगावाटको अपर तमोर हाइड्रोपावर आयोजनाका लागि साढे ६३ अर्ब र १३९.२ मेगावाटको तल्लो मनाङ मर्स्याङ्दी जलविद्युत् परियोजनाका लागि करिब साढे ३३ अर्ब बराबरको लगानी स्वीकृत भएको छ ।
यस्तै, बैठकले संखुवासभामा निर्माण हुने ६७९ मेगावाटको तल्लो अरुण जलविद्युत परियोजनाको विस्तृत सम्भाव्यता अध्ययनको लागि सर्वेक्षण अनुमति–पत्र जारी गर्ने समझदारी–पत्रको मस्यौदा पनि स्वीकृत गरेको छ । उक्त आयोजनाको अध्ययन भारतीय कम्पनी एसजेभीएन लिमिटेड इन्डियाले गर्नेछ ।
साथै, बैठकले पश्चिम सेती र एसआर–६ संयुक्त जलविद्युत परियोजनाको विकास तथा लगानीको खाका तयार गर्न अध्ययन गर्न राष्ट्रिय योजना आयोगका उपाध्यक्षको संयोजकत्वमा एक समिति गठन गरेको छ । तमोर जलाशययुक्त आयोजनाको प्राविधिक समितिको अध्ययन प्रतिवेदन कार्यान्यवन गर्न स्वीकृति दिएको छ ।
यस्तै, बैठकले अरुण ३ जलविद्युत परियोजना प्रवेश मार्ग अन्तर्गत छ्याङ्कुटी–दिदिङ खण्डमा पर्ने जग्गाको मुआब्जा उपलब्ध गराउने आवश्यक प्रकृया अगाडि बढाउन लगानी बोर्डको कार्यालयलाई निर्देशन दिएको छ ।
यसैगरी, झापाको दमकमा निर्माण हुने प्रस्ताव गरिएको मुलुककै सबैभन्दा ठूलो औद्योगिक पार्क–चाइना नेपाल फ्रेन्डसिप पार्कको विस्तृत परियोजना प्रतिवेदन (डीपीआर) स्वीकृत गरेको छ ।
त्यस्तै, यस्तै, बैठकले ३ आयोजनाको अध्ययनका लागि म्याद थप गरेको छ । बैठकले सम्राट सिमेन्ट इन्डस्ट्री र दाङ सिमेन्ट इन्डस्ट्रीको वातावरणीय प्रभाव मूल्यांकन (ईआइए) र मुक्तिनाथ केबलकारको डीपीआरका लागि म्याद थप गर्ने निर्णय गरेको छ ।
