काठमाडौं । सेयर बजारमा उछाल आएको छ । गत बुधबारदेखि निरन्तर ओरालो लागेको बजार आज उच्च अंकले कमब्याक गरेको हो ।
५ दिनमै करिब १९० अंकले घटेको बजार आज एकैदिन ७९ अंकले बढेको छ । सूचकमा ठूलो अंकको सुधार आए पनि कारोबार रकम भने घटेको छ । यससाता दैनिक साढे ११ अर्बको कारोबार हुँदै आएकोमा आज घटेर सवा १० अर्बमा सीमित भएको छ ।
आज कारोबारमा आएका २२५ कम्पनीमध्ये २०१ कम्पनीको सेयर मूल्य बढेको छ भने बैंकहरुको डिबेञ्चरसहित १५ कम्पनीको मूल्यमा गिरावट आएको छ । ९ कम्पनीको मूल्य स्थिर रहेको छ ।
उछाल आएको बजारमा आज एभरेष्ट इन्स्योरेन्सका प्रमोटर सेयरधनीले सबैभन्दा धेरै ३.०५ प्रतिशत गुमाएका छन् ।
यस्तै, गोर्खा फाइनान्सको सेयर मूल्य १.५७ प्रतिशतले घटेको छ । रुरु जलविद्युत्, आरम्भ चौतारी लघुवित्त, नेरुडे लघुवित्त, सूर्योदय लघुवित्त र सबैको लघुवित्तको सेयर मूल्य १ प्रतिशतभन्दा कमले घटेको छ ।
