काठमाडौं । नेपाल धितोपत्र बोर्डले स्वार्थ समूहले चलखेल गरी मूल्य बढाइएका ५१ वटा कम्पनीको सूची सार्वजनिक गरेको छ ।
पछिल्लो समय केही कम्पनीको सेयर मूल्य अस्वभाविक बढेपछि बोर्डले कमिटी नै बनाएर अध्ययन गरेको थियो । सोही अध्ययनका आधारमा बोर्डले चलखेल गरी मूल्य बढाइएका कम्पनीहरुको नामावली सार्वजनिक गरेको हो ।
स्वार्थ समूहले खासगरी नियमित वित्तीय विवरण सार्वजनिक नगरेका र कमजोर वित्तीय अवस्था भएका कम्पनीहरुको सेयर कर्नरिङ गरी अचाक्ली मूल्य बढाएको बोर्डको अध्ययन समितिको निष्कर्ष छ ।
१ वर्षमा सेयर मूल्य ३०० प्रतिशतभन्दा बढीले वृद्धि भएका, प्रतिसेयर आम्दानी ऋणात्मक भएका, प्रतिसेयर नेटवर्थ १०० रुपैयाँभन्दा कम भएका, मूल्य आम्दानी (पीई रेसियो) १०० भन्दा बढी भएका र कम्पनीको हालको वित्तीय अवस्थाको मूल्यांकन गरेर उक्त सूची सार्वजनिक गरिएको बोर्डले जनाएको छ ।
बोर्डका अनुसार सबैभन्दा धेरै हाइड्रोपावर कम्पनीको सेयर मूल्यमा चलखेल भएको छ । बोर्डले सार्वजनिक गरेको ५१ वटा कम्पनीमधये २० वटा हाइड्रो कम्पनी रहेका छन् ।
नेप्सेमा सूचीकृत ४० वटा कम्पनीमध्ये २० वटाको चलखेल गरी सेयर मूल्य बढाइएको बोर्डको ठहर छ । बोर्डका अनुसार माथिल्लो तामाकोशी, रसुवागढी, साञ्जेन जलविद्युत्, राधी विद्युत कम्पनी, आँखु खोला जलविद्युत् कम्पनी, अरुण भ्याली हाइड्रोपावर बरुण हाइड्रोपावर, छ्याङदी हाइड्रोपावरको सेयर मूल्यमा तीव्र चलखेल भएको छ ।
यस्तै, माउण्टेन इनर्जी, लिबर्टी इनर्जी, हिमालयन ऊर्जा विकास कम्पनी, दिव्यश्वरी हाइड्रोपावर, खानीखोला हाइड्रोपावर, माउण्टेन हाइड्रो, रैराङ हाइड्रोपावर, पञ्चकन्या माई हाइड्रोपावर, रिडी हाइड्रोपावर, यूनियन हाइड्रो पावर, युनिभर्सल पावर कम्पनी र सिनर्जी पावर रहेका छन् ।
१ वर्षको अवधिमा यी हाइड्रोपावर कम्पनीहरुको १० गुणासम्म मुल्य बढाइएको छ । बोर्डले जोखिमपूर्ण ठहर गरेका यी २० कम्पनीका लगानीकर्ता फस्ने सम्भावना देखिएको छ । तत्काल कुनै प्रतिफल दिन नसक्ने यी कम्पनीको सेयर महँगोमा किनेका लगानीकर्ता फस्ने देखिएको हो ।
