फेक अर्डर राखेर चलखेल गर्नेलाई नेप्सेको अंकुश, टीएमएसबाट ‘एओएन’ सुविधा हटायो
चाणक्य पोष्ट
प्रकाशित : 12:55 pm, आइतबार, जेठ ३०, २०७८

Advertisement Section

काठमाडौं । नक्कली माग देखाई सेयरमा चलखेल गर्नेलाई नेपाल स्टक एक्सचेञ्ज (नेप्से)ले लगाम लगाएको छ । फेक डिमाण्ड हटाउन नेप्सले अनलाइन सेयर कारोबार व्यवस्थापन प्रणाली (टीएमएस) मा रहेको एओएन (अल अर नन) अप्सन हटाएको हो ।

 

नेपाल धितोपत्र बोर्डको निर्देशन अनुसार सेयर बजार सञ्चालक नेप्सेले आजदेखि (जेठ ३० गते ) खरिद आदेशतर्फ उक्त सुविधा हटाएको हो ।यद्यपि, विक्रीतर्फ भने हाल सो व्यवस्था कायमै छ ।

 

स्वार्थ समूहले ठूलो संख्यामा फेक अर्डर देखाउँदै कुनै पनि कम्पनीको सेयर कर्नरिङ गर्दै चलखेल गर्ने क्रम बढेपछि सोको नियन्त्रण गर्न नेप्सले टीएमएसबाट एओन सुविधा हटाएको हो । नेप्सेको यस्तो व्यवस्थाले अब कसैले पनि नक्कली अर्डर राखेर खरिद चाप देखाउन सक्नेछैनन् अर्थात् जति कित्ताका लागि अर्डर गरेको हो सो एकमुष्ट आउने छैन ।

 

उदाहरणका लागि कुनै लगानीकर्ताले ‘ए’ कम्पनीको १० हजार कित्ता सेयर खरिदका लागि अर्डर गरेको छ भने एकमुष्ट नआएर टुक्रटुक्रमा आउने छ । यसअघि एओएन गर्दा १० हजार  कित्ता एकैचोटी आउने नभए १ कित्ता पनि नआउने व्यवस्था थियो । अब भने १० हजार कित्ता अर्डर गर्दा १०/२० जति कित्ता गरेर पनि आउने छ ।

 

स्वार्थ समूहले किन्नका लागि भन्दा पनि अन्य लगानीकर्तालाई आकर्षित गर्न फेक अर्डर राखी खरिद चाप देखाएर सेयरको भाउ बढाउने गर्थे ।

Advertisement Section