काठमाडौं। सिभिल बैंकको प्रमुख कार्यकारी अधिकृत (सीईओ)मा सुनिलकुमार पोखरेल नियुक्त भएका छन् ।बैंक सञ्चालक समितिको बिहीबार (जेठ २७ गते) बसेको बैठकले उनलाई ४ वर्षका लागि सीईओमा नियुक्त निर्णय गरेको हो ।
असार १८ गतेदेखि लागू हुने गरी उनलाई बैंकले सीईओमा नियुक्त गरेको हो ।पोखरेल वैशाख १८ गतेदेखि सिभिल बैंकको कामु प्रमुख कार्यकारी अधिकृतका रुपमा कार्यरत थिए । उनी कामु प्रमुख कार्यकारी हुनुअघि पनि सोही बैंकमा नायब प्रमुख कार्यकारी अधिकृतको जिम्मेवारीमा थिए।
पोखरेलसँग करिब ३ दशक लामो बैंकिङ क्षेत्रको अनुभव छ । उनले सन् १९९१ मा तत्कालिन ग्रिण्डलेज (हाल स्ट्यान्डर्ड चार्टर्ड) बैंकबाट करियर शुरु गरेका थिए । चार्टर्डमा उनले करिब १९ वर्ष बिताएका थिए ।
त्यसपछि पोखरेलले एनआइसी एशियामा करिब ५ वर्ष, नबिल बैंकमा १ वर्ष काम गरे। उनीसँग ३ वर्ष विदेशी बैंकमा काम गरेको अनुभव छ । उनले नबिलबाट छाडेपछि म्यानमारस्थित युनाइटेड अमरा बैंकमा डेढ वर्ष र म्यानमारकै एजीडी बैंकमा पनि डेढ वर्ष काम गरेका थिए ।
