लगानीकर्ता घुमिफिरी हाइड्रोमा फर्किए, यी ११ कम्पनीका सेयरधनी मालामाल
चाणक्य पोष्ट
प्रकाशित : 3:16 pm, बिहीबार, जेठ २७, २०७८

काठमाडौं । सेयर बजारमा झिनो करेक्शन आएको छ । बुधबार दोहोरो अंकले घटेको बजारमा आज न्यून अंकको करेक्शन आएको हो ।

 

प्रफिट बुक गर्ने हाबी हुँदा विक्री चाप बढ्दा बजारमा करेक्शन आएको अनुमान गरिएको छ । सूचकमा सामान्य गिरावट आए पनि कारोबार रकम भने उत्साहजनक नै रहेको छ ।

 

बजार घटेको बेला सस्तोमा सेयर उठाउने हाबी हुँदा आज पनि १६ अर्ब बढीको कारोबार भएको छ । यसअघि बैंक र बीमा कम्पनीमा प्रफिट बुक गरेका लगानीकर्ता आज हाइड्रोपावरमा सिफ्ट भएका छन् ।

 

आज सेयर बजार मापक सूचक नेप्से १.८० अंकले घटेर २९४४.७८ विन्दुमा आइपुगेको छ । नेपाल स्टक एक्सचेन्जका अनुसार आज २२० कम्पनीको १६ अर्ब १० करोड ४ लाख १२ हजार ४३६ रुपैयाँ बराबरको ३ करोड ६ लाख ६ हजार ६०४ कित्ता सेयर किनबेच भएका छन् ।

 

आज कारोबारमा आएका १३ वटा समूहमध्ये ६ समूहको परिसूचकमा हरियाली छाएको छ भने ७ समूहको परिसूचक राताम्मे भएका छन् । हाइड्रोपावर समूहको परिसूचक सबैभन्दा धेरै ८८.६५ अंकले बढेको छ भने जीवन बीमा समूह २७३.७८ अंकले घटेको छ ।

 

आज कारोबारमा आएका २२१ कम्पनीमध्ये १०४ कम्पनीको सेयर मूल्य बढेको छ भने १०६ कम्पनीको मूल्यमा गिरावट आएको छ । १० कम्पनीको मूल्य स्थिर रहेको छ ।

 

आज एचआइडीसीएलको सर्वाधिक कारोबार भएको छ । यसको ९९ करोड रुपैयाँ बढीको कारोबार भएको छ । कारोबार रकमकै आधारमा नेपाल पुनर्बीमा कम्पनी ५७ करोड र लुम्बिनी विकास बैंक ४५ करोडको कारोबार सहित शीर्ष तीन स्थानमा रहे ।

 

झिनो अंकले घटेको बजारमा आज ११ कम्पनीको सेयर मूल्य पोजेटिभ सर्किट लागेको छ । पाँचथर पावर कम्पनीको सेयर मूल्य ठ्याक्कै १० प्रतिशतले बढेको छ ।

 

शिवश्री हाइड्रोपावर, ङादी पावर, माउन्टेन इनर्जी, रिडी हाइड्रोपावर, वरुण हाइड्रोपावर, सीईडीर्बी हाइड्रोपावर, अरुण भ्याली, जोशी हाइड्रोपावर, छ्याङ्दी हाइड्रोपावर र पोखरा फाइनान्सका सेयरधनीले करिब १० प्रतिशत कमाएका छन् ।

 

घट्दो बजारमा आज आज गोर्खा फाइनान्सका सेयरधनीले सबैभन्दा धेरै ४.२५ प्रतिशत गुमाएका छन् ।