काठमाडौं । तीन महिनादेखि लगातार ओरालो लागेको सेयर बजारमा पहिरो जाने क्रम अझैं रोकिएको छैन । पछिल्लो समय विवादमा आएको भारित औसत विधिबाट लाभकर गणना गर्ने सम्बन्धी समस्या समाधान नहुँदा बजार झनै शिथिल बन्दै गएको छ ।
गतहप्ता अर्थ समितिले बैंकलाई तत्काल ब्रोकरको लाइसेन्स दिन रोक्न निर्देशन दिएपछि त्यसको प्रत्यक्ष असर सेयर बजारमा देखिएको छ ।
आइतबार सेयर बजार सूचक मापक नेप्से ९.२० अंकले घटेर १२१४.८३ अंकमा आइपुगेको छ । आज १६० कम्पनीको ३२ करोड ९५ लाख २७ हजार ९१५ रुपैयाँमा कारोबार भएको छ । ११ लाख १ हजार ७७६ कित्ता सेयर खरिद बिक्री भएका छन् ।
आज कारोबार भएका ११ समूहको सूचक मध्ये उत्पादन समूह बाहेक अन्य सबै समूहको सूचक घटेको छ। सबैभन्दा धेरै जीवन बीमा समूहको समूहको सूचक ८७.४२ अंकले घटेको छ । वाणिज्य बैंक समूह ४.२५ अंकले घटेको छ ।
आज कारोबार रकमको आधारमा एनआइसी एसिया बैंक शीर्ष स्थानमा रहेको छ । यसको २ करोड ४५ लाख ३४ हजार ४५६ रुपैयाँको कारोबार भएको हो ।
आज सबैभन्दा धेरै ग्लोबल आइएमई लघुवित्तको मूल्य ९.८५% ले बढेको छ भने गुराँस लघुवित्तको सबैभन्दा धेरै ४.७५% ले घटेको छ ।
