काठमाडौं । आइएमई लाइफ इन्स्योरेन्सले ६० करोड रुपैयाँ बराबरको प्राथमिक साधरण सेयर (आइपीओ) जारी गर्ने भएको छ ।
कम्पनीले आगामी जेठ ३१ हुने साधरण सभामा आइपीओ जारी गर्ने विशेष प्रस्ताव लैजाने भएको छ । कम्पनीको सभा रजिष्टर्ड कार्यालय लैनचौर, काठमाडौंमा हुनेछ ।
कम्पनीले आइपीओ जारी गर्ने प्रस्ताव गत वर्ष नै पारित गरे पनि धितोपत्र बोर्डमा आवेदन दिएको थिएन । कम्पनीले प्रतिकित्ता १०० रुपैयाँ दरले ६० करोड रुपैयाँ बराबरको ६० लाख कित्ता आइपीओ जारी गर्ने भएको हो ।
कम्पनीले बीमा समितिले तोकेको न्यूनतम चुक्ता पूँजी २ अर्ब कायम गर्न सर्वसाधारणमा सेयर जारी गर्ने भएको हो । हाल १ अर्ब ४० करोड रुपैयाँ चुक्ता पूँजी रहेको कम्पनीको आइपीओ निष्काशन पछि चुक्ता पूँजी २ अर्ब पुग्नेछ भने संस्थापक साधारण शेयर स्वामित्व अनुपात ७०ः३० प्रतिशत कायम हुनेछ।
आइपीओ निष्काशन गर्न कम्पनीले सिभिल क्यापिटललाई शेयर निष्काशन तथा विक्री प्रबन्धक नियुक्त गरिसकेको छ।