काठमाडौं । अक्सिजन सिलिण्डर ल्याउन नेपाल वायुसेवा निगमको जहाज आज चीन जाने भएको छ । चीन सरकारले निःशुल्क उपलब्ध गराएको सिलिण्डर लिन निगमको वाइड बडी ३३० जहाज आज बेइजिङ जाने भएको हो ।
निगमका अनुसार राति साढे ११ बजे नेपालबाट बेइजिङ प्रस्थान गर्ने र मंगलबार दिउँसो साढे २ बजे स्वदेश आइपुग्ने छ ।
नेपालमा कोरोना भाइरस संक्रमित बढेसँगै अक्सिजन र सिलिण्डर चरम अभाव भएको छ । नेपालको अवस्थालाई मध्येनजर गर्दै सहयोगार्थ चीन सरकारले २० हजार थान खाली सिलिण्डर दिने घोषणा गरेको थियो ।
सोमध्ये पहिलो चरणमा निगमको जहाज मार्फत ४०० सिलिण्डर ल्याइने भएको हो । सोही विमानबाट १० थान भेन्टिलेटर र १७३ थान अक्सिजन कन्सर्नट्रेटर पनि ल्याउन लागिएको जनाइएको छ ।
२० हजारमध्ये २ हजार जहाजबाट र १८ हजार सडकमार्ग हुँदै नेपाल ल्याइने छ । नेपाल सरकारका अनुरोधमा चीन सरकारले निःशुल्क दिएको ती सिलिन्डर ल्याउन थालिएको हो ।
नेपालमा अहिले अक्सिजन सिलिन्डर ६ हजार २८८ रहेको र दैनिक एक हजार ४११.५ लिटर खपत भइरहेको जनाइएको छ ।
