काठमाडौं । नेपालमा कोरोनाको दोस्रो लहर शुरु भएसँगै नेपाल धितोपत्र बोर्ड (सेबोन) ले त्यसको रोकथाम तथा नियन्त्रणका लागि ६ बुँदे निर्देशन जारी गरेको छ ।
पछिल्लो समय कोरोना संक्रमण बढ्दै गएपछि धितोपत्र बजार तथा सम्पूर्ण धितोपत्र व्यवसायीलाई सेवा प्रवाह गर्दा सवाधानी अपनाउन आग्रह गर्दै बोर्डले ६ बुँदे निर्देशन जारी गरेको हो ।
बोर्डले सकेसम्म सेवा प्रवाह गर्दा विद्युतीय माध्यमको प्रयोग गर्न गराउन आग्रह गरेको छ । कार्यालय स्थलमा सेवाग्राही तथा कर्मचारीहरुलाई मास्क र सेनिटाइजरको प्रयोग अनिवार्य गर्न गराउन निर्देशन दिएको छ।
यस्तै, कार्यालयमा २५ जनाभन्दा बढी सेवाग्राही नहुने गरी सेवा प्रवाह गर्न, तालिम, गोष्ठी, सेमिनार लगायत कार्याक्रम भर्चुअल माध्यमबाट गर्न भनेको छ ।
नेपाल सरकारले तोकेको जनस्वास्थ्यसम्बन्धी मापदण्ड पूर्ण पालना गर्न गराउन पनि बोर्डले निर्देशन दिएको छ।
