काठमाडौं। अर्थमन्त्री विष्णु पौडेलले गैर आवसिय नेपालीहरुलाई (एनआरएन) लगानीको दूत बन्न आग्रह गरेका छन् । एनआरएनको पहलमा स्थापना भएको एनआरएन नेपाल डेभलपमेन्ट फण्ड नामको कोषको औपचारिक शुरुवात गर्न अर्थ मन्त्रालयमा आयोजित कार्यक्रममा मन्त्री पौडेलले उक्त कुरा बताएका हुन् ।
एनआरएनको पहलमा नेपालको विभिन्न क्षेत्रमा लगानीको लागि १० अर्ब रुपैयाँको कोषको औपचारिक शुरुवात भएको छ । उक्त कोषमा नेपाल सरकारको पनि ५ प्रतिशत हिस्सेदारी रहने छ । आज (सोमबार) अर्थ मन्त्रालयमा आयोजित कार्यक्रममा कोषको औपचारिक शुरुवात भएको जानकारी दिइएको हो ।
एनआरएन नेपाल डेभलपमेन्ट फण्ड नामको उक्त कोषले नेपालको विभिन्न क्षेत्रमा लगानीको अवसर खोज्ने, विश्वभर छरिएको नेपालीहरुको पूँजी एकत्रित गर्ने र मूलरुपमा नेपालको विकास र समृद्धिको लागि लगानी गर्ने कोषका प्रमुख कार्यकारी अधिकृत अनलराज भट्टराईले बताए ।
सन् २००७ मा नेपालमा आयोजित अन्तराष्ट्रिय सम्मेलनमा उक्त कोषको बारेमा औपचारिक घोषणा भएको थियो । त्यसको करिब १३ वर्ष पछि नेपाल सरकारको समेत सहभागीतामा उक्त कोषको औपचारिक शुरुवात भएको हो ।
एनआरएनका अध्यक्ष कुमार पन्तले आगामी दिनमा कोषको आकार वृद्धि गर्दै ५० अर्ब देखि १ खर्ब सम्म पुर्याउने योजना रहेको बताए । यसैगरी कोषका अध्यक्ष उपेन्द्र महतोले कोषको माध्यमबाट पैसा मात्र नभएर ज्ञान, सीप, प्रविधि, कर्पोरेट संस्कृति, सुशासन र पारदर्शिता पनि आउने दाबी गरे ।
कार्यक्रममा अर्थ सचिव शिशिर ढुङ्गानाले कोषले मूल रुपमा ‘होल्डिङ कम्पनी’को रुपमा काम गर्नुपर्ने र परम्परागत भन्दा पनि कोरोना कहरले निम्त्याएको चुनौतीको बेलामा नयाँ नयाँ लगानीको क्षेत्रहरु खोजेर लगानी गर्नुपर्नेमा जोड दिए ।
कार्यक्रममा अर्थमन्त्री विष्णु पौडेलले एनआरएनलाई विश्वास जित्ने गरि काम गर्न आग्रह गरे । उनले नेपाल हमेशा विदेशबाट लगानी भित्राउन तयार रहको तर उक्त रकम कालो धन हुन नहुने र बैंकिङ च्यानलबाट मात्रै आउनुपर्ने बताए ।
उनले नेपालमा राजनीतिक अस्थिरता नरहेको र हिंसाको संभावना पनि समाप्त भएका कारण ढुक्क भएर लागनी गर्न एनआरएनलाई आग्रह गरे ।
कोषको ८५ प्रतिशत रकम विश्वभरका एनआरएनहरुबाट कम्तीमा १० डलरको हिसाबले उठाइने बताइएको छ । नेपालमा यस कम्पनीको आइपिओ जारी गरिने जानकारी पनि कार्यक्रममा दिइएको थियो ।
