काठमाडौं । वाग्मती प्रदेशको राजधानी हेटौंडालाई संघीय राजधानी काठमाडौं जोड्ने भीमफेदी-कुलेखानी (पोस्टबहादुर बोगटी) सुरुङमार्ग निर्माण प्रक्रिया अघि बढेको छ ।
वाग्मती प्रदेश सरकारको रणनीतिक महत्वको आयोजना अन्तर्गत रहेको उक्त सुरुङमार्ग निर्माणका लागि अन्तर्राष्ट्रिय स्तरका ६ वटा परामर्शदाता कम्पनीको छनोट गरेको हो ।
सुरुङमार्गको लम्बाइ ३.२१ किलोमिटर लामो सुरुङ निर्माण गर्न लागिएको हो । सुरुङमार्ग दुईलेनको हुनेछ । सुरुङको चौडाइ १५ मिटर हुनेछ । दुवै लेन साढे सात मिटर फराकिलो हुने बताइएको छ । सुरुङको दुवैतिर गरी साढे दुई किलोमिटर लामो सहायकसडक र तीनवटा पुल निर्माण हुनेछ ।
भीमफेदी-कुलेखानी सुरुङमार्ग निर्माण आयोजनाले परार्शदाता छनोटका लागि गत भदौमा आशयपत्र माग गरेको थियो । जसमा नेपालीसहित १२ अन्तर्राष्ट्रिय स्तरका कम्पनीले आवेदन दिएका थिए । आशयपत्र पेश गर्ने १२ वटा कम्पनीमध्ये ६ वटा कम्पनीलाई परामर्शदाताको रुपमा छनोट गरिएको आयोजना प्रमुख नवीनकुमार सिंहले जानकारी दिए ।
नेपालको एकसहित सिंगापुर, कोरिया, टर्की, र अस्ट्रेलियाका कम्पनी छनोटमा परेको जनाइएको छ । छनोट भएका कम्पनीहरुमा एम/एस डोल्सार इन्जीनेरिङ, दोहा इन्जिनेरिङ इन्टरकन्टिनेन्टल कन्सलटेन्ट एण्ड टेक्नोलोजी जेभी, एम/एस इप्टास सभिसेस डे इन्जिनेरिया, यूक्सेल प्रोजे ए.एस जेभी रहेको छ ।
यस्तै, एम/एस इसान कर्पोरेसन, कोरिढा जेभी, एम/एस मेइन्हर्ट (सिङगापुर) दासन कन्सलटेन्ट जेभी, एम/एस एसएमईसी इन्टरनेशनल पीटीवाई लिमिटेड, कोरिया इन्जिनियर कन्सलटेन्ट जेभी, एम/एस योसिन इन्जिनीयरिङ करपोरेसन, टेक कन्ट्रो एस.ए, जेभी छनतोटमा परेका छन् ।
छनोटमा परेका कम्पनीहरुबाट जेठ २ गतेसम्म प्राविधिक र आर्थिक प्रस्ताव माग गरिएको आयोजना प्रमुख सिंहले जानकारी दिए ।उनका अनुसार अहिले सुरुङमार्गको वातावरणीय प्रभाव मूल्यांकन (ईआइए) को काम भइरहेको छ । वैशाख अन्तिमसम्म ईआइए र डीपीआर पुनरावलोकन रिपोर्ट आइसक्ने र भदौसम्ममा सुरुङमार्ग निर्माणका लागि टेन्डर आह्वान गर्ने आयोजनाले जनाएको छ ।
भीमफेदी गाउँपालिका–६ बगर र इन्द्रसरोवर गाउँपालिका–२ कुलेखानी जोड्ने गरी ३.२१ किलोमिटर लामो सुरुङ निर्माण गर्न लागिएको हो । सुरुङमार्ग दुईलेनको हुनेछ । सुरुङको चौडाइ १५ मिटर हुनेछ । दुवै लेन साढे सात मिटर फराकिलो हुने बताइएको छ । सुरुङको दुवैतिर गरी साढे दुई किलोमिटर लामो सहायकसडक र तीनवटा पुल निर्माण हुनेछ ।
आयोजनाको कुल लागत १९ अर्ब ३२ करोड ५ लाख ७६ हजार रुपैयाँ रहने अनुमान गरिएको छ । बहुवर्षीय योजनालाई आव २०७७/७८ मा २ अर्ब, २०७८/७९ मा ६ अर्ब, २०७९/८० मा ६ अर्ब र २०८०/८१ मा ४ अर्ब रहने गरी बजेट विनियोजन गरिने जनाइएको छ । चालू आवमा आयोजनाका लागि १ अर्ब बजेट विनियोजन गरिएको छ ।
सम्झौता भएको ४२ महिनामा काम सक्ने लक्ष्य राखिएको उक्त सुरुङमार्गले भीमफेदी–कुलेखानी सडकको दूरी १७ किमीले छोटिने छ । प्रदेश राजधानी हेटौँडाबाट संघीय राजधानी प्रवेश गर्ने वैकल्पिक मार्ग ६५ किलोमिटरमा सीमित हुनेछ ।
