काठमाडौं । अमेरिकाको न्यूयोर्क सहरलाई उछिन्दै चीनको राजधानी बेइजिङ्ग विश्वका सबैभन्दा धेरै अर्बपति भएको शहर बनेको छ । फोर्ब्सले सार्वजनिक गरेको नयाँ सूची अनुसार बेइजिङमा विश्वकै सबैभन्दा धेरै अर्बपति बस्ने सहर बनेको हो ।
बेइजिङमा यो वर्ष मात्रै ३३ जना अर्बपति थपिएसँगै न्यूयोर्कलाई उछिन्दै धेरै अर्बपति भएको सहर बनेको हो । फोर्ब्सका अनुसार हाल बेइजिङमा अर्बपतिको कुल संख्या १०० पुगेको छ । यो न्यूयोर्ककोभन्दा १ जनाले धेरै हो । न्यूयोर्कमा अर्बपतिको संख्या ९९ रहेको छ ।
विगत सात वर्षदेखि न्यूयोर्क सहर धनाढ्य अर्बपतिहरुको सूचिमा शीर्ष स्थानमा रहँदै आएको थियो । कोरोना भाइरसको महामारीमाथि चीनले तीव्र गतिमा कायम गरेको नियन्त्रण, प्रविधि क्षेत्रमा चिनियाँ कम्पनीको बढ्दो वर्चश्व र शेयर बजारले चिनियाँ धनाढ्यहरुलाई अर्बपतिको सूचिमा थप्ने क्रम तीव्र भएको हो ।
अर्बपतिको संख्या बेइजिङमा धेरै भए पनि अर्बपतिहरुको कुल सम्पत्तिमा भने न्यूयोर्क नै अघि छ । न्यूयोर्कका अर्बपतिहरुको कुल सम्पत्ती बेइजिङ्गका अर्बपतिको भन्दा ८० बिलियन अमेरिकी डलर बढी रहेको बताइएको छ ।
अर्बपतिको संख्या भने अमेरिकामै धेरै
धेरै अर्बपतिको सहर चीनमा भए पनि विश्वमा सबैभन्दा धेरै अर्बपति भएको देशमा भने अमेरिका शीर्ष स्थानमा रहेको छ । अमेरिकामा कुल ७२४ अर्बपति रहेका छन् । यो चीनको भन्दा ९८ जना बढी हो ।
अमेरिकामा गत वर्ष अर्बपतिको संख्या ६१५ रहेको थियो भने यो वर्ष बढेर ७२४ पुगेको छ । उनीहरुको कुल सम्पत्तिको नेटवर्थ ४.४ ट्रिलियन डलर रहेको छ । अमेरिका विश्वमै सबैभन्दा धेरै अर्बपति हुने देशको शीर्ष स्थानमा रहेको छ ।
फोर्ब्सका अनुसार गतवर्ष सबैभन्दा धेरै चिनियाँ नागरिक अर्बपति बनेका छन् । कोरोनाका बीच २३८ जना चिनियाँ अर्बपति थपिएका हुन् । गत वर्ष जम्मा ३८८ अर्बपति रहेको चीनमा १ वर्षमै अर्बपतिको संख्या बढेर ६२६ पुगेको छ । उनीहरुको कुल सम्पत्ति नेटवर्थ २.५ ट्रिलियन डलर रहेको छ । चीन विश्वमा धेरै अर्बपति हुने देशको दोस्रो नम्बरमा रहेको छ ।
