काठमाडौं । ज्योति लाइफ इन्स्योरेन्सको प्राथमिक साधरण सेयर (आइपीओ) बाँडफाँट भएको छ ।
इन्स्योरेन्सको कर्पोरेट कार्यालयमा आज भएको बाँडफाँट अनुसार भाग्यमानी ५ लाख ९४ हजार जनाले गोलप्रथाबाट १० कित्ताका दरले सेयर पाएका छन् भने १२ लाख ३ हजार ८३५ जनाको हात रित्तो भएको छ ।
विक्री प्रबन्धक एनएमबी क्यापिटलका अनुसार कम्पनीको आइपीओमा कुल १८ लाख ४२ हजार ४८० जनाले आवेदन दिएका थिए भने ४१ हजार ७०३ जनाको आवेदन रद्द भएको थियो ।
आवेदन रद्दभएकासहित ६७.७६ प्रतिशतले कम्पनीको सेयर पाएनन् भने जम्मा ३२.२४ प्रतिशतले मात्र सेयर हात पारे । अर्थात् ३ जनामध्ये गोलाप्रथाबाट एक जनाले मात्र सेयर पाएका हुन्।
कम्पनीले फागुन २१ गतेदेखि प्रतिकित्ता १०० रुपैयाँ अंकित मूल्यमा ६६ करोड रुपैयाँ बराबरको ६६ लाख कित्ता आइपीओ विक्रीमा ल्याएको थियो ।
हाल १ अर्ब ५४ करोड रुपैयाँ चुक्ता पूँजी रहेको कम्पनीको आइपीओ निष्काशन पछि चुक्ता पूँजी २ अर्ब २० करोड रुपैयाँ पुग्नेछ ।
कहाँबाट हेर्ने रिजल्ट
यसअघि विभिन्न सञ्चारमाध्यमबाट पनि आइपीओको नतिजा हेर्न मिल्ने व्यवस्था भए पनि अहिले भने ३ ठाउँबाट मात्रै नतिजा हेर्न मिल्ने भएको छ । लगानीकर्ताको गोपनीयताको विषयमा प्रश्न उठेसँगै सीडीएससीले आइपीओको नतिजा तीन ठाउँबाट मात्रै हेर्न मिल्ने व्यवस्था गरेको हो ।
कम्पनीको आइपीओको रिजल्ट ३ ठाउँबाट हेर्न सकिने छ । लगानीकर्ताले मेरो सेयर (नतिजा हेर्न यहाँ क्लिक गर्नुहोस्), विक्री प्रबन्धक एनएमबी क्यापिटल र ज्योति लाइफ इन्स्योरेन्सको वेबसाइटमार्फत नतिजा हेर्न सक्नेछन् ।
