काठमाडौं । हरेक वर्ष खेती लगाउने सिजनमा रासायनिक मल अभाव झेलेर आजित भएका कृषकहरुलाई यस वर्ष भने केही राहत मिल्ने भएको छ ।
सरकारले बंगलादेशबाट सरकार–सरकारबीच (जीटुजी) प्रक्रियाबाट खरिद गरेर ल्याएको मल अबको एकहप्ता भित्र नेपाल आइपुग्ने भएपछि यस वर्ष गहुँ, चैतेधान लगायतका लागि मल अभाव नहुने भएको हो ।
सरकारले बंगलादेशबाट ५० हजार मेट्रिकटन मल ल्याउन लागेको हो । पहिलो चरण अन्तर्गत २२ हजार ५०० मेट्रिकटन मल रेलमा लोड गरेर ल्याउन लागिएको हो ।त्यसपछि अबको १५ दिनमा १० हजार मेट्रिकटन र त्यसको १५ दिनमा १७ हजार ५०० मेट्रिकटन थप मल आयात हुने छन् ।
सरकारले बंगलादेशबाट खरिद गर्न लागेको ५० हजार मेट्रिकटन मल मध्ये पहिलो चरणमा ल्याउन लागेको २२ हजार मेट्रिकटन मल भारतको कोलकत्ता आइपुगेको छ । सो मल एकहप्तामै नेपाल आइपुग्ने कृषि सामग्री कम्पनीका प्रवक्ता विष्णु पोखरेलले बताए ।
उनका अनुसार बंगलादेशबाट ल्याइएको मल हाल कोलकत्तामा आइपुगेको र नेपालतर्फ ल्याउन मल प्याकिङ भइरहेको छ । उनले सो मल कोलकात्ताबाट ३ देखि ५ दिनमा नेपाल आइपुग्ने बताए ।
‘अहिले कोलकत्तामा मल प्याकिङ गर्ने काम भइरहेको छ, शुक्रबारसम्ममा काठमाडौं हिँड्ने छ, त्यहाँबाट हिँडेको छिटोमा ३ दिन ढिलोमा ५ दिनभित्र मल आइपुग्ने छ,’ पोखरेलले चाणक्य पोष्टसँग भने ।
पहिलो चरण अन्तर्गत २२ हजार ५ सय मेट्रिकटन मल रेलमा लोड गरेर ल्याउन लागिएको हो । सो पश्चात अबको १५ दिनमा १० हजार मेट्रिकटन र त्यसको १५ दिनमा १७ हजार ५ सय मेट्रिकटन थप मल आयात हुने छन् ।
सो मल आयात पछि वेयरहाउसमा राखिने छ । त्यसपछि अन्य सहकारीको माध्यबाट किसानसम्म पुर्राइने उनले बताए । सरकारले बंगलादेशसँग जीटुजीमा खरिद गरेको सो यूरिया मल अबको १ महिनामा सबै आयात भइसक्ने उनको भनाइ छ । बंगलादेशसँग सरकारले ५० हजार मेट्रिकटन युरिया मल खरिद गर्ने प्रक्रिया गत भदौमा शुरु गरेको थियो । नेपालले बङ्गलादेशसँग प्रतिमेट्रिक टन २५९.१९५ अमेरिकी डलरमा मल खरीद गरेको हो ।
गत वर्ष धान रोप्ने समय जेठ–असारमा युरिया मलको हाहाकार भएपछि तत्कालीन कृषिमन्त्री घनश्याम भुसालले छोटो प्रक्रियामा मल आयात गर्न बंगलादेश उत्तम विकल्प भएको भन्दै कुराकाननी अगाडि बढाएका थिए । त्यसपछि प्रधानमन्त्री केपी शर्मा ओलीले भदौ १६ मा बंगलादेशकी समकक्षी सेख हसिनासँग टेलिफोन संवादमा तत्काल सापटी मल ल्याउन आग्रह गरेका थिए ।
बंगलादेशकी प्रधानमन्त्री हसिनाले सो समयमा उक्त प्रस्ताव स्वीकार गरे पनि पछि सापटी नदिने निर्णय गरेको थियो । बंगलादेशले पैँचोमा मल नदिने भएपछि सरकारले यूरिया मल किनेर ल्याउन पुसमा ठेक्का लगाएको थियो ।
हाल कम्पनीसँग ९ हजार ४३८ मेट्रिकटन युरिया, ३० हजार ६७१ मेट्रिकटन डीएपी र ६ हजार ६७९ पोटास मौज्दात रहेको र मलको कुनै अभाव नरहेको दाबी कम्पनीको छ ।
