काठमाडौं। मोलुङ हाइड्रोपावर कम्पनीले ३५ करोड ३१ लाख रुपैयाँ बराबरको प्राथमिक साधरण सेयर जारी गर्ने भएको छ ।
कम्पनीले प्रतिकित्ता १०० रुपैयाँदरले आइपीओ जारी गर्न सनराइज क्यापिटललाई सेयर विक्री प्रबन्धकमा नियुक्त गरेको छ । सेयर निष्कासन सम्बन्धी सम्झौतापत्रमा कम्पनीका प्रबन्ध सञ्चालक अमृतकुमार महर्जन र क्यापिटलका प्रमुख कार्यकारी विजयलाल श्रेष्ठले हस्ताक्षर गरे ।
कम्पनीले आयोजना प्रभावित ओखलढुंगाका स्थानीयलाई ८ करोड २ लाख ५० हजार रुपैयाँ बराबरको ८ लाख २ हजार ५०० कित्ता र सर्वसाधरणका लागि २७ करोड २८ लाख ५० हजार रुपैयाँ बराबरको २७ लाख २८ हजार ५०० कित्ता आइपीओ निष्काशन गर्ने भएको हो ।
कम्पनीले यसअघि साधारण सभाबाट आइपीओ जारी गर्ने प्रस्ताव पारित गरिसकेको छ । अबै छिट्टै धितोपत्र बोर्डमा निवेदन दिने र बोर्डको अनुमति पाउने बित्तिकै आइपीओ जारी गर्ने कम्पनीले जनाएको छ ।
कम्पनीको गत माघ २५ गते सम्पन्न ११ औं वार्षिक साधारण सभाबाट कम्पनीको अधिकृत पूँजी वृद्धि गरी १ अर्ब र जारी पूँजी वृद्धि गरी ८० करोड २५ लाख पुर्याउने निर्णय गरेको थियो । उक्त निर्णय पश्चात सेयर संरचना अन्तर्गत जारी पूँजीमा ५६ प्रतिशत संस्थापक सेयर र ४४ प्रतिशत सर्वसाधारणको सेयर हिस्सा रहनेछ।
मोलुङ्ग हाइड्रोपावर कम्पनीले ओखलढुंगाको मोलुङ्ग खोलामा ७ मेगावाट जलविद्युत आयोजना निर्माण सम्पन्न गरी २०७४ चैत १२ गतेबाट व्यापारिक विद्यृत उत्पादन शुरु गरी संचालनमा रहेको छ ।