काठमाडौं । माथिल्लो तामाकोशी हाइड्रोपावर कम्पनीको सेयर मूल्यमा आइतबार उछाल आएको छ । लामो समयसम्म सामान्य घट/बढ भइरहेको कम्पनीको सेयर मूल्यमा आइतबार एकाएक उछाल आउँदा पोजेटिभ सर्किट अर्थात् भाउ १० प्रतिशतले बढेको छ ।
आज तामाकोशीको सेयर मूल्य प्रतिकित्ता ४९ रुपैयाँले बढेर ५३९ रुपैयाँ पुगेको छ । बिहीबार प्रतिकित्ता ४९० रुपैयाँ रहेको तामाकोशी सेयर मूल्य आज बजार खुल्नसाथ १० प्रतिशतले बढेको हो । दिउँसो साढे १ बजेसम्म कम्पनीको साढे २ लाखभन्दा बढी कित्ता सेयरको माग भए पनि विक्रीकर्ता भने शून्य रहेका छन् ।
देशकै सबैभन्दा ठूलो ४५६ मेगावाटको तामाकोशीको जलविद्युत् आयोजनाको टर्बाइनमा पानी खसाल्ने पाइप (बाइफर्केसन डिस्ट्रिब्युसन) को परीक्षण सफल भएपछि लगानीकर्ता उत्साहित हुँदा सेयर मूल्यमा उछाल आएको हो ।
आयोजनाले गत हप्तादेखि बाइफर्केसन डिस्ट्रिब्युसनको परीक्षण शुरु गरेको थियो भने शनिबार परीक्षण सफल भएको जानकारी गराएको छ ।
आयोजनाको सबैभन्दा जटिल र संवेदनशील मानिएको यो पाइपको परीक्षण सफल भएपछि चैतभित्र बिजुली बाल्न सकिने आयोजनाले जनाएको छ । अब छिट्टै बिजुली निकालिने सम्भावना बढेसँगै लगानीकर्ता कम्प्नीको सेयरप्रति आकर्षित भएका छन् ।
आयोजनाको विद्युत्गृहमा ७६ मेगावाटका ६ वटा टर्बाइन रहेको छन् । ती मध्ये एउटा टर्बाइनबाट आगामी चैत्रभित्र बिजुली निकालिने आयोजनाले जनाएको छ ।
राष्ट्रिय गौरवको आयोजनाका रुपमा रहेको माथिल्लो तामाकोशी निर्माण शुरु भएको १ दशक बिते पनि अझै निर्माण पूरा हुन सकेको छैन । भूकम्प, कामदार अभाव, निर्माण सामग्रीको अभाव, ठेकेदारको ढीलासुस्ती र लापारबाही लगायत कारणले आयोजनाको कामले गति लिन नसकेको हो ।
शुरुवाती समयमा करिब ३५ अर्ब लगानीमा निर्माण हुने भनिए पनि अहिले आयोजनाको लागत बढेर दोब्बर भइसकेको छ भने अझै कति बढ्ने हो भन्ने निश्चित छैन ।
