काठमाडौं । कोरोनाका कारण वाणिज्य बैंकहरुको नाफा घटेसँगै प्रतिसेयर आम्दानीमा पनि गिरावट आएको छ ।
गत आर्थिक वर्षको दोस्रो त्रैमासको तुलनामा चालू आर्थिक वर्षको दोस्रो त्रैमासमा बैंकहरुको प्रतिसेयर आम्दानी औसतमा ४.७९ प्रतिशतले घटेको छ ।
गत आवको पुस मसान्तसम्म औसतमा २३.७६ रुपैयाँ रहेको वाणिज्य बैंकहरुको प्रतिसेयर आम्दानी चालू आवको पुसमा घटेर १८.९७ रुपैयाँमा सीमित भएको छ ।
नेप्सेमा सूचीकृत २६ वाणिज्य बैंकमध्ये २१ बैंकको प्रतिसेयर आम्दानी घटेको छ भने जम्मा ५ बैंकको मात्र प्रतिसेयर आम्दानी बढेको छ । चालू आवमा ११ वटा बैंकहरुले नाफा बढाए पनि जम्मा ४ बैंकको मात्र प्रतिसेयर आम्दानी बढेको छ ।
सामान्यतया नाफा र प्रतिसेयर आम्दानी बीच सकरात्मक सम्बन्ध रहन्छ । नाफा बढ्दा प्रतिसेयर आम्दानी पनि बढ्ने र घट्दा घट्ने हुन्छ । तर, यसपटक यो सम्बन्ध उल्टो देखिएको छ ।
कोरोनाका बाबजूद नाफा बढाए पनि केही बैंकको भने प्रतिसेयर आम्दानी घट्न पुगेको छ । बैंकहरुले लगानी गरेको कर्जा समयमै असुल हुन नसक्दा खराब कर्जा बढेसँगै त्यस्तो कर्जाबापतको रकम नाफाबाटै प्रोभिजन गर्दा बैंकहरुको नाफा बढे पनि प्रतिसेयर आम्दानी घटेको हो ।
चालू आवको दोस्रो त्रैमासमा बैंकहरुको नाफा औसतमा २.२६ प्रतिशतले गिरावट आएको छ ।पुस मसान्तसम्ममा नेप्सेमा सूचीकृत २६ वाणिज्य बैंक (राष्ट्रिय वाणिज्य बैंक बाहेक) ले कुल २९ अर्ब ३२ करोड रुपैयाँ नाफा कमाएका छन्। गत वर्षको सोही अवधिको भन्दा ६८ करोडले कमी हो । बैंकहरुले गत आवको पुससम्म ३० अर्ब खुद मुनाफा कमाएका छन् ।
समीक्षा अवधिसम्म एउटा बैंकले अैसतमा १ अर्ब १२ करोड मुनाफा कमाएका छन् । गत वर्ष यसै अवधिमा बैंकहरुले औसतमा १ अर्ब १५ करोड कमाएका थिए ।
२६ वटा बैंकमध्ये ग्लोबल आइएमइ बैंक सबैभन्दा धेरै नाफा कमाउने बैंक बनेको छ भने सिभिल सबैभन्दा कम कमाउने बैंक बनेको छ । पुससम्म ग्लोबलले २ अर्ब ३१ करोड र सिभिलले २० करोड नाफा कमाएका छन् ।
५ बैंकको मात्र प्रतिसेयर आम्दानी बढ्यो
चालू आवको दोस्रो त्रैमासमा जम्मा ५ बैंकको मात्र प्रतिसेयर आम्दानी बढेको छ । दोस्रो त्रैमासमा प्रभु, एनएमबी, सिटिजन्स, नेपाल बंगलादेश र कुमारी बैंकको मात्र प्रतिसेयर आम्दानी बढेको छ ।
समीक्षा अवधिमा प्रभु बैंकले सबैभन्दा धेरै ४.६५ रुपैयाँले प्रतिसेयर आम्दानी बढाएको छ । गत आवको दोस्रो त्रैमासमा २२.१२ रुपैयाँ रहेको बैंकको प्रतिसेयर आम्दानी चालू आवमा बढेर २६.७७ रुपैयाँ पुगेको छ ।
एनएमबीले प्रतिसेयर आम्दानी २.१९ रुपैयाँ बढाएर २२.५० रुपैयाँ पुर्याएको छ । यसैगरी बंगलादेशले २.१९ रुपैयाँ बढाएर २२.१६ रुपैयाँ, सिटिजन्सको १.८८ रुपैयाँ बढेर १७.८३ र कुमारीले ७० पैसा बढेर १७.५३ रुपैयाँ पुगेको छ ।
२१ बैंकको प्रतिसेयर आम्दानी घट्यो
चालू आवको दोस्रो त्रैमासमा २१ वाणिज्य बैंकको प्रतिसेयर आम्दानी घटेको छ । जसमा सबैभन्दा धेरै हिमालयन बैंकको प्रतिसेयर आम्दानी सबैभन्दा धेरै ७० प्रतिशतले घटेको छ ।
गत आवको दोस्रो त्रैमासमा ४०.९० रुपैयाँ रहेको हिमालयन बैंकको प्रतिसेयर आम्दानी २८.६७ रुपैयाँले घटेर १२.२३ रुपैयाँमा सीमित भएको छ ।यस्तै, समीक्षा अवधिमा नेपाल एसबीआई, स्ट्यान्डर्ड चार्टर्ड, एभरेष्ट र नबिल बैंकको प्रतिसेयर आम्दानी १२ रुपैयाँभन्दा धेरैले घटेको छ ।
नेप्सेमा सूचीकृत २६ वाणिज्य बैंकमध्ये जम्मा ३ वछा बैंकको प्रतिसेयर आम्दानी २५ रुपैयाँ बढी रहेको छ । जसमा सबैभन्दा धेरै एनआइसी एशिया बैंकको रहेको छ । एनआइसीको प्रतिसेयर आम्दानी ३५.७३ रुपैयाँ रहेको छ । यस्तै, दोस्रो स्थानमा रहेको नबिलको २९.९१ रुपैयाँ र तेस्रो स्थानको प्रभुको २६.७७ रुपैयाँ छ ।
वाणिज्य बैंकहरुमध्ये सबैभन्दा कम प्रतिसेयर आम्दानी सिभिल बैंकको रहेको छ । समीक्षा अवधिमा सिभिल बैंकको प्रतिसेयर आम्दानी २.५३ रुपैयाँ छ ।
