काठमाडौं । भारत सरकारले अनुदानमा नेपाललाई दिएको कोरोना भाइरस विरुद्धको खोप काठमाडौं आइपुगेको छ ।
एअर इन्डियाको विमानमार्फत आज १० लाख डोज खोप नेपाल ल्याइएको हो । स्वास्थ्य तथा जनसंख्या मन्त्रालयका अनुसार आज बिहान उक्त खोप ल्याइपुर्याइएको हो ।
उक्त खोप टेकुस्थित स्वास्थ्य सेवा विभागमा भण्डारण गरिने र विभागबाट प्रत्येक प्रदेशको भण्डारण केन्द्रमा खोप पठाइनेछ ।
सरकारले उक्त खोप फ्रन्टलाइनमा काम गर्ने स्वास्थ्यकर्मी, सुरक्षा निकायका कर्मचारी लगायतलाई लगाउने तयारी गरेको छ ।
नेपाल ल्याइएको उक्त कोभिसिल्ड खोप भारतको सिरम इन्स्टिच्युट अफ इन्डयाको उत्पादन हो । भारतमा ३ हजार जनामा गरिएको अन्तिम चरणको परीक्षणमा यो खोप ९० प्रतिशत प्रभावकारी देखिएको थियो ।
