काठमाडौं । नेपाली सेयर बजारको हालसम्मको सबैभन्दा ठूलो प्राथमिक साधरण सेयर (आइपीओ) विक्री खुला भएको छ ।
नेपाल इन्फ्रास्ट्रक्चर बैंकले आजदेखि ८ अर्ब रुपैयाँ बराबरको ८ करोड कित्ता सेयर आइपीओ विक्री खुला गरेको हो ।
यो इतिहासकै सबैभन्दा ठूलो आइपीओ हो । यसअघि गत वर्ष नेपाल पुनर्बीमा कम्पनीले सबैभन्दा ठूलो १ अर्ब ६० करोड रुपैयाँ बराबरको आइपीओ जारी गरेको थियो ।
निष्काशित कुल ८ करोड कित्तामध्ये बैंकले कर्मचारीका लागि १ लाख ६० हजार कित्ता (०.२० प्रतिशत) र सामूहिक लगानी कोषका लागि ४० लाख कित्ता (५ प्रतिशत) छुट्याइएको छ । बाँकी रहेको ७ करोड ५८ लाख ४० हजार कित्ताका लागि सर्वसाधारणले आवेदन दिन पाउनेछन् ।
बैंकको आइपीओमा माघ ६ गतेसम्म आवेदन दिन पाइनेछ । सो अवधिसम्म सबै सेयर विक्री नभएमा ढिलोमा माघ १६ गतेसम्म आवेदन दिन पाइनेछ ।बैंकको आइपीओमा न्यूनतम १० कित्तादेखि अधिकतम २ करोड कित्तासम्मको लागि आवेदन दिन सकिनेछ ।
कम्पनीको आइपीओमा सर्वसाधरणले विक्री प्रबन्धक एनआइबीएल एस क्यापिटल, धितोपत्र बोर्डबाट अनुमति प्राप्त सी–आस्वा सदस्यता प्राप्त गरेका बैंक तथा वित्तीय संस्थाका साथै मेरोसेयर मार्फत पनि आवेदन दिन सक्नेछन् ।
बैंकको सेयर अन्डरराइटरमा नागरिक लगानी कोष र विक्री प्रबन्धक एनआइबीएल एस क्यापिटल रहेका छन् ।बैंकको आइपीओलाई रेटिङ एजेन्सी इक्रा नेपालले ‘इक्रा एनपी(आइआर बीबीबी’ रेटिङ दिएको छ । यसले कम्पनीको वित्तीय अवस्था मध्यम रहेको र वित्तीय दायित्व पूरा गर्ने सम्बन्धमा मध्यम सुरक्षित रहेको जनाउँछ ।
कति कित्ता भर्नु उपयुक्त
धितोपत्र निष्काशन तथा बाँडफाँड नियमावली अनुसार सबै योग्य आवेदकलाई कम्तीमा १० कित्ताका दरले समानुपातिक हिसाबले आइपीओ बाँडफाँड गर्नुपर्ने हुन्छ।
कम्पनीले सर्वसाधरणलाई ७ करोड ५८ लाख ४० हजार कित्ता छुट्याएको छ । यसअघि खुलेका आइपीओमा साढे १२ लाखले आवेदन दिँदै आएका छन् । पछिल्लो समय डिम्याट खाता खोल्नेको संख्या पनि ह्वात्तै बढेको छ । यसआधारमा करिब १५ लाख जनाले आइपीओ भर्ने आँकलन गरिएको छ ।
त्यस अनुसार बैंकको आइपीओ सबैलाई समानुपातिक रुपमा बाँड्दा ५० कित्ता पाउने सम्भावना देखिन्छ । तर, सबै आवेदकले ५० कित्ताका लागि आवेदन नगर्न पनि सक्छन् । त्यसैले बैंकको आइपीओमा न्यूनतम ५० देखि ८० कित्ता अर्थात् ५ हजारदेखि ८ हजार रुपैयाँ बराबरको आवेदन दिनु उपयुक्त देखिन्छ ।
कम्पनीको वित्तीय अवस्था
बैंकको अधिकृत पूँजी ३४० अर्ब, जारी पूँजी २० अर्ब र हाल चुक्तापूँजी १२ अर्ब रहेको छ भने आइपीओ विक्रीपछि चुक्ता पूँजी २० अर्ब रुपैयाँ पुग्नेछ । बैंकको संस्थापक र साधारण सेयर संरचना अनुपात ६०स्४० प्रतिशत हुनेछ ।
बैंकले चालू आवको पहिलो त्रैमासमा १८ करोड १ लाख रुपैयाँ खुद नाफा कमाएको छ। यो गत आवको सोही अवधिको तुलनामा १२।४३ प्रतिशतले कमी हो । बैंकले गत आवको पहिलो त्रैमासमा २० करोड ५७ लाख खुद नाफा कमाएको थियो ।
समीक्षा अवधिमा बैंकको वितरण योग्य नाफा १८ करोड १ लाख रुपैयाँ रहेको छ भने बैंकको जगेडा कोषमा १ अर्ब ८१ करोड रुपैयाँ रहेको छ ।बैंकले २८ अर्ब ३५ करोड रुपैयाँ ब्याज आम्दानी गरेको थियो ।
समीक्षा अवधिमा बैंकले २५ करोड रुपैयाँ निक्षेप संकलन गरी ९ करोड रुपैयाँ लगानी गरेको छ । बैंकको प्रतिसेयर आम्दानी ७।०६ रुपैयाँ रहेको छ भने प्रति सेयर नेटवर्थ ११३।६२ रुपैयाँ रहेको छ ।
