सेयर बजारमा अर्को पनि सिमेन्ट उद्योग आउँदै, प्रिमियममा आइपीओ जारी गर्ने
चाणक्य पोष्ट
प्रकाशित : 5:26 pm, बुधबार, पुस २९, २०७७

काठमाडौं । पछिल्लो समय सेयर बजारमा आउन चाहने कम्पनीको संख्या बढ्दै गएको छ । सेयर बजार बुल रनमा गइरहेका बेला बजारमा आउन खोज्ने नयाँ कम्पनीको संख्या पनि बढ्न थालेको हो ।

 

यसैक्रममा अर्को सिमेन्ट उद्योग आउने पनि सेयर बजारमा आउने भएको छ । अहिले शिवम् सिमेन्ट मात्र रहेकोमा अब सोनापुर मिनरल्स एण्ड आयल कम्पनी (सोना सिमेन्ट) पनि थपिने भएको हो ।

 

कम्पनी सञ्चालक समितिको पुस २६ गते बसेको बैठकले माघ २२ गते हुने १३ औं वार्षिक साधारण सभामा प्रिमियममा आइपीओ जारी गर्ने विशेष प्रस्ताव लैजाने निर्णय गरेको हो ।

 

यस्तै, कम्पनीले साधारण सभामा वार्षिक प्रतिवेदन पेश गर्ने, आर्थिक वर्ष २०७६/७७ को वासलात, नाफा नोक्सान हिसाब र नगद प्रवाह विवरणमा छलफल गरी पारित गर्ने, संचालक समितिको निर्वाचन गर्ने लगायत प्रस्ताव मुख्य एजेण्डाको रुपमा लैजाने भएको छ ।

 

कम्पनीले सोना टेक सिमेन्ट, सोनाली सिमेन्ट, सोना सिमेन्ट, सोना चाँदी सिमेन्ट, सोनापुर सिमेन्ट र सोना श्री सिमेन्ट उत्पादन गर्दै आएको छ ।

 

यसअघि सवोत्तम सिमेन्टले पनि बुक बिल्डिङ विधिबाट आइपीओ जारी गर्ने घोषणा गरिसकेको छ ।

Advertisement Section