काठमाडौं । कोरोना कहरका बीच सन् २०२० मा नेपालमा झन्डै २ लाख मोटरसाइकल भित्रिएका छन् ।
२०२० को जनवरीदेखि डिसेम्बर १५ तारिखसम्ममा १ लाख ८८ हजार ३०८ यूनिट दुई पाङ्ग्रे सवारी साधन आयात भएको छ ।
यसरी आयात भएको मोटरसाइकलमा सबैभन्दा ठूलो हिस्सा बजाज मोटरसाइकलको रहेको छ । कुल आयातको २८ प्रतिशतभन्दा बढी हिस्सा बजाजले ओगट्न सफल भएको छ । यस अवधिमा बजाजले कुल ५३ हजार २५१ यूनिट आयात गर्दै सर्वाधिक आयात गर्ने दुई पाङ्ग्रे कम्पनी बनेको छ ।
सन् २०२० मा ३६ हजार २२३ यूनिट मोटरसाइकल तथा स्कुटर आयात गर्दै यामाहा दोस्रो स्थानमा पर्न सफल भएको छ । यामाहले कुल आयातको १९ प्रतिशत हिस्सा ओगट्न सफल भएको देखिन्छ ।
टीभीएसले ३२ हजार ५५७ यूनिट आयत गर्दै तेस्रो स्थान पाएको छ । टीभीएसको बजार हिस्सा १७ प्रतिशत पुगेको देखिन्छ ।
चौथो स्थानमा पुगेको होन्डाले गतवर्ष ५ महिनासम्म सामान्य आयत गरेका कारण ३२ हजार १३४ यूनिट मात्रै आयात गरेको देखिन्छ । यद्यपि कम्पनीको अक्टोबर र नोभेम्बर आयात भने किनै राम्रो रहेको छ । कम्पनीले कुल आयातको १७ प्रतिशत बजार हिस्सा ओगटेको छ ।
सूचीको पाँचौ स्थानमा हिरो रहेको छ । हिरोले सोही अवधिमा १९ हजार ४३९ यूनिट आयात गर्दै आफुलाई पाँचौ स्थानमा उभ्याउन सफल भएको छ ।
यी ५ कम्पनी बाहेक अन्य कम्पनीले १४ हजार ७०४ यूनिट आयात गरेका छन् । यी कम्पनीले ८ प्रतिशत बजार हिस्सा ओगटेका छन् ।
