काठमाडौं । पछिल्लो समय देशभरका मुख्य पर्यटकीय स्थानमा केबलकार बनाउने क्रम बढेको छ ।देशका धार्मिक तथा पर्यटकीय स्थानमा पर्यटकलाई आकर्षित गर्न केबलकार बन्ने क्रम बढेको हो ।
यसैबीच, काठमाडौं उपत्यका भित्र २ स्थानमा केबल कार बन्ने भएको छ । ललितपुरको गोदावरी र काठमाडौंको नागार्जुनमा केबल कार निर्माण हुने भएको हो । यी केबलकार बनाउन १ अर्ब ३२ करोड रुपैयाँ लाग्ने जनाइएको छ ।
नागार्जुन नगरपालिका वडा नम्बर १ मा भ्यू नागार्जुन केबल कार प्रालिले केबल कार निर्माण गर्ने भएको हो । कम्पनीले ६६ करोड रुपैयाँ लगानीमा सो केबल कार बनाउन लागेको हो ।
केबल कार सञ्चालनमा आएपछि पछि वर्षेनी ११ लाख २० हजार जनालाई सेवा दिइने कम्पनीले जनाएको छ ।
यस्तै, ललितपुरको नगरपालिकाको फुल्चोकी केबल कार बन्ने भएको हो । फुल्चोकी केबुलकार प्रालिले सो केबल कार बनाउन लागेको हो ।
उक्त केबुलकार ६६ करोड रुपैयाँ लगानीमा निर्माण हुन लागेको हो । सो केबल कारले वर्षेनी ११ लाख ३७ हजार ५०० मानिसहरुलाई सेवा दिनेछ ।
यी दुई केबलकार बनेपछि उपत्यकामा केबलकारको संख्या तीन पुग्नेछ । हाल काठमाडौंको चन्द्रागिरीमा चन्द्रागिरी हिल्सले केबलकार सञ्चालन गरिरहेको छ ।
