काठमाडौं। साताको कारोबारको पहिलो दिन नेप्से आकर्षक ढंगले उकालो लागेको छ । विगत केही दिनयता सुस्ताएको नेप्से आज ४६.४३ अंकले बढेर २०१०.४५ मा बन्द भएको छ ।
तुलनात्मक रुपमा आज नेप्सेमा कम उतारचढाव देखिएको छ । आज दिनभर नेप्सेमा ४३ अंकको उतारचढाव भएको छ । आज ९० ला भन्दा बढि कित्ता सेयर कारोबार हुँदा ४ अर्ब ८९ करोड रुपैयाँको कारोबार भएको छ ।
आजको बजारको नेतृत्व नेपाल लाइफ इन्स्योरेन्सले गरेको छ । १३५ अंक बढेर २०३५ मा बन्द भएको नेपाल लाइफको मात्र आज ६७ करोड रुपैयाँको कारोबार भएको छ । यसैगरी दोस्रोमा पूर्नबीमाको ३५ करोड ९४ लाख रुपैयाँको कारोबार भएको छ । यो कम्पनीको सेयर भने १ रुपैयाँले घटेको छ । तेस्रो सबैभन्दा धेरै कारोबार हुने कम्पनी भने हिमालयन डिस्टीलरी रहेको छ । ३७० रुपैयाँ प्रतिकित्ता बढेको यो कम्पनीको आज ३० करोड रुपैयाँको कारोबार भएको छ । त्यसपछि अत्याधिक धेरै कारोबार हुने कम्पनीहरुमा अपर तामाकोशी र चिलिमे रहेका छन् ।
आज ३ वटा कम्पनीको सेयर १० प्रतिशतले बढको छ । माहुली लघुवित्त, साधना लघुवित्त र नारायणी विकास बैंकको सेयर १० प्रतिशतले बढेको हो । यसैगरी हिमालयन डिस्टिलरीको सेयर ९.१५ र सिभम सिमेन्टको सेयर ७.२६ प्रतिशतले बढको छ ।
पछिल्लो समय नेप्सेमा निकै चर्चित अपर तामाकोशीको सेयरमा भने ४.८४ प्रतिशतको गिरावट आएको छ । यसैगरी दोस्रोमा आँखु खोला हाइड्रोपावरको सेयर ३.५५ प्रतिशतले घटेको छ ।
उप–सूचकहरुको कुरा गर्दा हाइड्रोमा सबैभन्दा धेरै १.६३ प्रतिशतको गिरावट आएको छ भने उत्पादन ५.९९ प्रतिशतले बढेको छ ।
