काठमाडौं । चालू आर्थिक वर्षमा सडक पुल निर्माणले गति लिएको छ । चालू आर्थिक वर्षको पहिलो चार महिनामै करिब ३ दर्जन पुल निर्माण सम्पन्न भएक छन् ।
सडक विभागका अनुसार कात्तिक मसान्तसम्ममा देशभरका विभिन्न खोला तथा नदीमा ३५ वटा पक्की पुल निर्माण सम्पन्न भएको छ । विभागका सूचना अधिकारी रमेश कुमार सिंहले चालू आवमा करिब ३०० पुल निर्माण सम्पन्न गर्ने लक्ष्य रहेकोमा अहिलेसम्म ३५ वटा पुल निर्माण सम्पन्न भएको सडक बताए ।
‘यो चौमासिकमा ३५ वटाका हाराहारीमा पुल निर्माण सम्पन्न भएका छन्, एकीन तथ्यांक आइनसकेकाले त्यसमा केही थप/.घट भने हुन सक्छ,’ सिंहले चाणक्य पोष्टसँग भने ।
विगतका वर्षदेखि नै ठेक्का लागेको पुलहरु निर्माण सम्पन्न भएको उनले बताए । निर्माण सम्पन्न भएका पुलहरुमा केही ठेक्का अवधि थप गरिएका समेत रहेको छन् ।
पछिल्लो समय अपवाद बाहेक ठेक्का अवधि थपिएका पुल निर्माण तीव्र गतिमा अघि बढेका छन् भने नयाँ ठेक्का लागेका पुलहरुको पनि निर्माण अघि बढेको छ । चालू आवको अन्त्यसम्ममा लक्ष अनुसार नै पुल निर्माण सम्पन्न हुने उनको विश्वास छ ।
गत आर्थिक वर्षमा ३०० पुल निर्माण सम्पन्न गर्ने लक्ष्य राखिएको थियो । सो मध्ये करिब ६० प्रतिशत मात्र पुल निर्माण सम्पन्न भएको थियो । गत आवको तेस्रो चौमासिकसम्ममा कुल २१० वटा पुल निर्माण सम्पन्न भएको थियो । गत आवका लागि सरकारले पुल निर्माणमा २ अर्ब ३८ करोड रुपैयाँ बजेट विनियोजन गरेको थियो ।
आर्थिक वर्ष २०७५/७६ मा कुल २४३ सडक पुल निर्माण सम्पन्न भएको थियो । सो प्रगतिलाई मध्यनज गर्दै गत आर्थिक वर्षदेसख ३ सय पुल निर्माण सम्पन्न गर्ने लक्ष्य राखिएको थियो । जुन लक्ष्य पूरा हुन सकेन ।
विशेष गरी कोभिड १९ का कारण पुल निर्माण लक्ष्य अनुरुप हुन नसकेको सूचना अधिकारी सिंह बताउँछन् । सरकारले २ वर्षभित्र तुइन, फड्के र अस्थायी साँघु जस्ता पुल विस्थापन गर्ने निर्णय गरेको थियो ।
विगतका समयमा सरकारले वार्षिक १०० का हाराहारीमा पुल निर्माण हुने गरेको थियो । २०७५/७६ देखि पुल निर्माणले गति लिन थालेको हो । गत आवमा कोभिडका कारण पुल निर्माण लक्ष्य अनुरुप हुन सकेको थिएन । विषेश गरी विभिन्न ठूला आयोजना अन्तर्गतका पुलहरु तीव्र गतिमा निर्माण भइरहेका हुन् ।
