काठमाडौं । चन्द्रागिरी हिल्सले यही मंसिर १७ गतेदेखि आयोजना प्रभावित क्षेत्रका स्थानीयका लागि प्राथमिक साधरण सेयर (आइपीओ) निष्काशन गर्ने भएको छ ।
कम्पनीले पहिलो चरणमा आयोजना प्रभावित क्षेत्रका लागि प्रतिकित्ता १०० रुपैयाँ अंकित मूल्यमा ३ करोड ६८ लाख १ हजार ९०० रुपैयाँ बराबरको ३ लाख ६ हजार ८१९ कित्ता आइपीओ निष्काशन गर्न लागेको हो ।
कम्पनीको आइपीओमा आयोजना प्रभावित काठमाडौंको चन्द्रागिरी नगरपालिका वडा नं. ३, ४, ६ र ७ ( साविक थानकोट गाविसका सबै वडा र महादेवस्थान गाविसका वडा नं. ३, ४, ५, ६, ७ र ८ ), मकवानपुरको थाहा नगरपालिका वडा नं. ९ र १० (साविक चित्लाङ गाविसका सबै वडा) र इन्द्रसरोवर गाउँपालिका वडा नं. ५ (साविक फाखेल गाविसका सबै वडा) का स्थानीयवासीले आवेदन दिन पाउनेछन् ।
कम्पनीले धितोपत्र बोर्डबाट १८ करोड ४० लाख ९१ हजार रुपैयाँ बराबरको १८ लाख ४० हजार ९१० कित्ता आइपीओ निष्काशन गर्न अनुमति पाएकोमा पहिलो चरणमा स्थानीयवासीमा आइपीओ जारी गर्न लागेको हो । स्थानीयमा आइपीओ जारी गरेपछि कम्पनीले दोस्रो चरणमा सर्वसाधरणमा १५ लाख ३४ हजार ९१ कित्ता आइपीओ जारी गर्नेछ ।
इच्छुक लगानीकर्ताले कम्पनीको आइपीओमा पुस १ गतेसम्म आवेदन दिन सक्नेछन् । लगानीकर्ताले न्यूनतम १० कित्तादेखि अधिकतम ३ हजार ६० कित्ताका लागि आवेदन दिन पाउनेछन् ।
कम्पनीको आइपीओ विक्री प्रबन्धकमा ग्लोबल आइएमई क्यापिटल रहेको छ । कम्पनीको आइपीओमा सर्वसाधरणले विक्री प्रबन्धक ग्लोलबल आइएमई क्यापिटल, धितोपत्र बोर्डबाट अनुमति प्राप्त सी–आस्वा सदस्यता प्राप्त गरेका बैंक तथा वित्तीय संस्थाका साथै मेरोसेयर मार्फत पनि आवेदन दिन सक्नेछन् ।
चन्द्रागिरी हिल्सले काठमाडौंको चन्द्रागिरीमा केबलकार सञ्चालन गरिरहेको छ भने त्यहाँ होटल, रिसोर्ट लगायतका संरचनाहरु निर्माण गररिरहेको छ ।
