काठमाडौं । साल्ट ट्रेडिङ कर्पोरेशनको सेयर मूल्य दुईहप्तामै दोब्बरले बढेको छ । जम्मा १२ कारोबार दिनमा कम्पनीको सेयर मूल्य ३५९२ रुपैयाँले बढेर सेयरधनीको सम्पत्ती दोब्बर भएको हो ।
नेपाल स्टक एक्सचेन्जका अनुसार कात्तिक १६ गते प्रतिकित्ता ३६५० रुपैयाँमा कारोबार भएको कम्पनीको सेयर मंसिर ४ गते (१२ कारोबार दिनमा) बढेर ७२४२ रुपैयाँ पुगेको छ ।
पछिल्ला १२ कारोबार दिनमध्ये निरन्तर ८ दिन सेयर मूल्यमा पोजेटिभ सर्किट लागेपछि सेयर मूल्य दोब्बर भएको हो ।
कम्पनीको सेयर मूल्य १ वर्षमा करिब ६ हजार रुपैयाँले वृद्धि भएको छ । गत मंसिरमा प्रतिकित्ता ११५९ रुपैयाँ रहेको कम्पनीको सेयर मूल्य वर्ष दिनमा ६ गुणाले बढेर ७ हजार २४२ रुपैयाँ पुगेको हो ।
कम्पनीको नेप्सेमा जम्मा १५ लाख ३५ हजार ४१८ कित्ता सेयर सूचिकृत छ । कम्पनीको सेयर संख्या अत्यन्तै कम भएको र न्यून व्यक्तिको हातमा मात्र सेयर भएकाले तीव्र चलखेल हुँदा सेयर मूल्यमा उछाल आएको लगानीकर्ताको आरोप छ । बढ्दो बजारमा साल्ट ट्रेडिङको सेयरमा कर्नरिङ गरी मूल्य अस्वभाविक वृद्धि गरिएको उनीहरुको भनाइ छ ।
